Crop Damage : ओगलेवाडीत ४० एकर ऊस जळून खाक

अॅग्रोवन वृत्तसेवा
ओगलेवाडी, जि. सातारा : शॉर्टसर्किटने लागलेल्या आगीत येथील ४३ शेतकऱ्यांचा सुमारे ४० एकर ऊस जळून (Sugarcane Crop Damage) खाक झाला. गुरुवारी दुपारी साडेबाराच्या सुमारास डुबल मळा (Dubal Mala) येथे ही आग लागली. महसूल विभागाच्या वतीने पंचनामे करण्याचे काम सुरू आहे. तर प्रशासनाने जळीत ऊस तातडीने गळितास न्यावेत तसेच शेतकऱ्यांना नुकसान भरपाई देण्याची मागणी शेतकऱ्यांतून होत आहे.

घटनास्थळावरून मिळालेल्या माहितीनुसार, टेंभू रोड रेल्वे स्टेशन फाट्याच्या दक्षिस बाजूस डुबल मळा आहे. गुरुवारी दुपारी साडेबारा वाजण्याच्या सुमारास येथील हणमंत जगताप यांच्या शेतातील विजेच्या खांबावर शॉर्टसर्किट झाल्याने प्रथम जगताप यांच्या उसाला आग लागली. वाऱ्याने ही आग परिसरात पसरली. डुबल मळ्यात लागलेली आग वणवे मळा व गोवारेच्या हद्दीपर्यंत पसरली. घटनेची माहिती मिळताच कऱ्हाड पलिकेच्या अग्निशमन विभागाच्या दोन गाड्या घटनास्थळी दाखल झाल्या.

अग्निशमन दलाच्या वतीने डुबल मळ्‍याच्या उत्तरेकडील आग आटोक्यात आणली. मात्र, उसाच्या शेतात मोठ्या प्रमाणात पावसाचे पाणी साचले असल्याने दक्षिण व पश्चिम बाजूकडील आग विझविण्यात अपयश आले. शेवटी उसाचे क्षेत्र संपल्यानंतर आपोआप आग विझली. तीन तास आगीचे तांडव सुरू होते. वर्ष ते दीड वर्ष सांभाळलेला व वाढवेला ऊस डोळ्‍यासमोर जळताना पाहून शेतकऱ्यांच्या जिवाची घालमेल झाली. तर अनेक शेतकऱ्यांना यावेळी अश्रू अनावर झाले. धुराचे लोट पाहून शेतकरी व ग्रामस्थांनी घटनास्थळी धाव घेतली. यावेळी आग विझविण्याचे मोठ्या प्रमाणात प्रयत्न करण्यात आले.