Government Fund : ३१४ कोटींचा निधी वापराविना पडून

Pune News : जिल्ह्यातील १ हजार ३८५ ग्रामपंचायतींच्या बँक खात्यांमध्ये ३१४ कोटी ६५ लाख ३० हजार ४११ रुपयांचा निधी वापराविना पडून आहे. यामध्ये प्रत्येक ग्रामपंचायतींकडे सरासरी सरासरी २२ लाख ७१ हजार ८६३ रुपये आहेत. ग्रामपंचायतींना वित्त आयोगाच्या निधीचा शेवटचा हप्ता मार्च महिन्यात मिळाला. एवढा निधी शिल्लक असताना गावांमध्ये विकास कामे गतीने होत नसल्याची स्थिती आहे.

पंधराव्या वित्त आयोगाच्या निधीतील बंधित निधीतून देखील कामे पूर्णत्वास जातानाचे चित्र ग्रामीण भागात नाही. या निधीतील ६० टक्के निधी घनकचरा आणि सांडपाणी व्यवस्थापनासाठी वापरणे बंधनकारक आहे. मात्र घनकचरा आणि सांडपाणी व्यवस्थापनाची कामे देखील हात नसल्याचे वास्तव आहे.

या व्यतिरिक्त, प्रत्येक ग्रामपंचायतीला प्रोत्साहन देण्यासाठी स्वच्छ भारत मिशनकडून अतिरिक्त अनुदान प्राप्त झाले आहे. जिल्ह्यातील ४०० हून अधिक ग्रामपंचायतींनी यासंदर्भात कामे पूर्ण देखील केली आहेत.

ग्रामपंचायतींनी गावच्या सर्वांगीण विकासासाठी हा निधी वापरला तर नव्याने निधी प्राप्त होईल. जिल्हा परिषदेकडून ग्रामपंचायतींना अंगणवाड्या सुधारण्याचे आवाहन करण्यात आले होते. त्यातून जवळपास ४ हजार अंगणवाड्यांचे कामे पूर्ण होऊ शकतात, असा विश्वास जिल्हा परिषदेच्या प्रशासनाकडून व्यक्त करण्यात आला.