Kharif Sowing : छत्रपती संभाजीनगर जिल्ह्यात अद्यापही २७ टक्के क्षेत्र पेरणीविना

Chhatrapati Sambhajinagar News : जिल्ह्यातील सर्वसाधारण ६ लाख ८४ हजार ७१६ हेक्टर क्षेत्रापैकी ५ लाख ५३ हजार हेक्टरवर खरिपाची पेरणी झाली आहे. सर्वसाधारण क्षेत्राच्या तुलनेत अजूनही जवळपास १ लाख ३१ हजार हेक्टर क्षेत्रावर पेरणी बाकी असल्याची स्थिती आहे.

जुलैचा अर्धा महिना ओलांडण्याची वेळ आली तरी पेरण्या बाकीच आहेत. जिल्ह्यात सर्वसाधारण क्षेत्राच्या तुलनेत ७३ टक्के पेरणी झाली आहे. ९ जून ते १० जुलै २०२३ या कालावधीत एकूण १३६.५ मिलिमीटर म्हणजेच ७८.४ टक्के पाऊस पडला आहे. मात्र पेरणीयोग्य झाला नसल्याने अजूनही पेरण्या बाकी आहेत.

पीकनिहाय स्थिती अशी...

कपाशी ः जिल्ह्याचे सरासरी क्षेत्र ३ लाख ९४ हजार ७७१ हेक्टर. त्यापैकी २ लाख ६३ हजार ८८७ हेक्टरवर लागवड झाली. ती सरासरी क्षेत्राच्या तुलनेत ६६.८५ टक्के आहे. पीक उगवणी व वाढीच्या अवस्थेत.

ज्वारी ः जिल्ह्याचे सरासरी क्षेत्र १३४३.६ हेक्‍टर. २७६ हेक्टरवर पेरणी. ती सरासरी क्षेत्राच्या तुलनेत केवळ २०.५४ टक्के. पीक उगवणीच्या व वाढीच्या अवस्थेत.

बाजरी ः सरासरी क्षेत्र ३१ हजार ९०४ हेक्टर. १० हजार ५७१ हेक्टरवर पेरणी. ती सरासरीच्या तुलनेत ३३.१३ टक्के.

मका : सरासरी क्षेत्र १ लाख ७७ हजार २८७ हेक्टर. १ लाख २८ हजार १९३ हेक्टरवर पेरणी. ती सरासरीच्या तुलनेत ७२.३१ टक्के.

तूर : सरासरी क्षेत्र ३५ हजार ७०० हेक्टर. १६,१३४ हेक्टरवर पेरणी. ती सरासरीच्या तुलनेत ४५.१९ टक्के

मूग : सरासरी क्षेत्र १३८२५ हेक्टर. ५ हजार १८५ हेक्टरवर पेरणी. ती सरासरीच्या तुलनेत ३७.५ टक्के.

उडीद ः सरासरी क्षेत्र ५३८४ हेक्टर. १५०७ हेक्टरवर पेरणी. ती सरासरीच्या २८ टक्के

भुईमूग : सरासरी क्षेत्र ६ हजार ६०४ हेक्टर. ३१४२ हेक्टरवर पेरणी. ती सरासरीच्या तुलनेत ४७.५७ टक्के.

सोयाबीन : सरासरी क्षेत्र १४,४२४ हेक्टर. १४ हजार ९७८ हेक्टर क्षेत्रावर पेरणी. ती सरासरीच्या तुलनेत १०३ टक्के