Economic Survey 2025 : आर्थिक पाहणी अहवालात द्राक्ष उत्पादक शेतकऱ्यांचा गौरव

Pune News : संसदेत सादर झालेल्या आर्थिक पाहणी अहवालात राज्याच्या निर्यातक्षम द्राक्ष शेतीचे कौतुक केले आहे. तसेच, द्राक्षाचे अर्थकारण युवा शेतकऱ्यांना द्राक्ष शेतीकडे आकर्षित करीत असल्याचे अहवालात नमूद करण्यात आले आहे.

आर्थिक पाहणी अहलात देशाच्या ग्रामीण अर्थव्यवस्थेमधील बदलाचा आढावा घेण्यात आला आहे. त्यात वाढत्या फलोत्पादनाचा उल्लेख आहे. ‘पारंपरिक शेतीपेक्षा फलोत्पादन अधिक उत्पादनशील व नफ्याचे ठरते आहे. त्यामुळे फलोत्पादन हा कृषी क्षेत्रातील झपाट्याने वाढणारा उद्योग बनतो आहे.

विशेष म्हणजे फलोत्पादनात आता भारत आघाडीचा निर्यातदार होतो आहे. २०२३-२४ मध्ये देशातून तीन हजार ४६० कोटी रुपयांची ३४३९८२ लाख टन द्राक्षे निर्यात झाली. महाराष्ट्र, कर्नाटक, तमिळनाडू व मिझोरम ही द्राक्ष उत्पादक राज्ये असून देशाच्या द्राक्षशेतीचे नेतृत्व महाराष्ट्र करतो आहे,’ असा गौरव या अहवालात केला गेला आहे.

आर्थिक पाहणी अहवालात नाशिकच्या द्राक्ष उत्पादक शेतकऱ्यांचे विशेष कौतुक करण्यात आले आहे. ‘नाशिकच्या द्राक्ष उत्पादकांची उपजीविका द्राक्ष शेतीमुळे समृद्ध झाली आहे. कारण, येथील शेतकऱ्यांनी निर्यातक्षम द्राक्षे पिकवून ती जागतिक बाजारात ६५ ते ७० रुपये प्रतिकिलो दराने विकत देशी बाजारपेठेपेक्षाही चांगले भाव प्राप्त केले आहेत. त्यामुळे नवी पिढी द्राक्ष शेतीकडे झुकते आहे,’ असे निरीक्षण अहवालात नोंदविले गेले आहे.

द्राक्ष उत्पादक शेतकऱ्यांनी शेती व्यवस्थेत अत्याधुनिक तंत्रांचा वापर केला. विशेषत: द्राक्ष शेतीत प्रत्यक्ष वेळेत नियंत्रण करणारी (रियल टाईम मॉनिटरिंग सिस्टिम) प्रणाली आणून दर्जेदार द्राक्ष उत्पादन केले आहे. सामूहिक कष्ट व तंत्रज्ञानावर आधारित निर्यातक्षम शेतीमधून एखाद्या प्रादेशिक भूभागातील सामाजिक व आर्थिक परिस्थितीचा कसा कायापालट होतो हेच नाशिकच्या द्राक्षशेतीमधील यशोगाथेने दाखवून दिले आहे, असाही गौरवपूर्ण उल्लेख केंद्रीय अर्थ मंत्रालयाने या अहवालात केला आहे.