Heatwave In Maharashtra: विदर्भात दोन दिवस उष्णतेची लाट; ब्रम्हपुरी येथे देशातील सर्वाधिक ४२ अंशाची झाली नोंद

Pune News : राज्यातील तापमानात मोठी वाढ झाली आहे. विदर्भात उन्हाचा चटका असह्य होत असून देशातील उच्चांकी तापमानाची नोंद झाली. विदर्भात हवामान विभागाने उष्णतेच्या लाटेचा ऑरेंज अलर्ट दिला आहे. तसेच तापमानातील वाढ कायम राहील, असाही अंदाज हवामान विभागाने दिला.

विदर्भातील बहुतांशी ठिकाणी तापमानाने चाळीशी ओलांडली आहे. त्यामुळे दुपारी घराबाहेर निघणे मुस्किल होत आहे. हवामान विभागाने आज अकोला, अमरावती, चंद्रपूर, नागपूर वर्धा आणि यवतमाळ जिल्ह्यात काही ठिकाणी उष्णतेच्या लाटेचा ऑरेंज अलर्ट दिला आहे.

उद्याही या जिल्ह्यांमध्ये काही भागात उष्णतेची लाट असेल, असाही अंदाज देण्यात आला. मराठवाडा आणि मध्य महाराष्ट्रातही काही ठिकाणी तापमानातील वाढ कायम आहे. त्यामुळे राज्यभरात उन्हाचा चटका असह्य होतोय.

देशातील सर्वाधिक तापमानाची नोंद आज विदर्भात झाली. विदर्भातील ब्रम्हपुरी येथे आज सकाळपर्यंतच्या गेल्या २४ तासांमध्ये ४२ अंश सेल्सिअस तापमानाची नोंद झाली. चंद्रपुरात ४१.८ अंश, अकोला ४१.५ अंश, नागपूर ४१.१ अंश आणि वर्धा येथे ४१ अंशे सेल्सिअस तापमान होते.

अमरावती, यवतमाळ जिल्ह्यातही तापमानाने चाळीशी पार केली आहे. मालेगावातही ४० अंश सेल्सिअस तापमान होते. राज्यातील तापमानातील वाढ कायम राहील, असा अंदाज हवामान विभागाने दिला.