Weather Update : विदर्भात तयार होतेय पावसाला पोषक हवामान

Pune News : राज्यात आकाश निरभ्र झाल्यानंतर जोरदार वारे वाहत आहेत. दिवसा उन्हाचा चटका वाढलेला असून, कमाल आणि किमान तापमानात चढ-उतार होत आहे. आज (ता. २२) किमान, कमाल तापमानातील चढ-उतार सुरूच राहणार आहे. शनिवारपासून (ता. २४) विदर्भात पावसाला पोषक होण्याचे संकेत हवामान विभागाने दिले आहेत.

राज्यात कमाल तापमानाचा पारा ३५ अंशांच्या पार गेल्याने उन्हाच्या झळा वाढल्या आहेत. बुधवारी (ता. २१) सोलापूर येथे राज्यातील उच्चांकी ३७.६ अंश सेल्सिअस तापमानाची नोंद झाली.

मध्य महाराष्ट्रात अनेक ठिकाणी किमान तापमान १५ अंशांच्या खाली असून, धुळे येथील कृषी विद्यालयात राज्यातील नीचांकी ९.४ अंशांची नोंद झाली आहे. आज (ता. २२) उन्हाचा चटका कायम राहणार असून, मध्य महाराष्ट्राच्या किमान तापमानातील घट कायम राहण्याची शक्यता आहे.

बुधवारी (ता. २१) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३४.३ (१३.३), धुळे ३५.० (९.४), जळगाव ३३.८ (१५.२), कोल्हापूर ३४.६ (१८.९), महाबळेश्वर २८.८ (१५.९), मालेगाव ३६.० (१७.६), नाशिक ३२.१ (१५.०), निफाड ३२.८ (१३.८), सांगली ३५.७ (१६.५), सातारा ३४.५ (१४.६), सोलापूर ३७.६ (१८.८), सांताक्रूझ ३२.९ (२०.८), डहाणू ३२.७ (१९.१), रत्नागिरी ३२.० (१७.६), छत्रपती संभाजीनगर ३३.४ (१८.२), नांदेड - (१८.०), परभणी ३५.४ (१७.८), अकोला ३६.१ (१७.९), अमरावती ३४.० (१८.१), बुलडाणा ३३.४ (१८.६), चंद्रपूर ३५.२ (१८.४), गडचिरोली ३३.६ (१७.०), गोंदिया ३३.५ (१७.८), नागपूर ३५.२(१६.८), वर्धा ३६.०(१८.४), वाशीम ३५.४ (१७.२), यवतमाळ ३७.० (१८.०).

राज्यात जोरदार वारे

बुधवारी (ता. २१) सकाळपर्यंतच्या २४ तासांमध्ये पंजाबच्या अमृतसर येथे देशाच्या सपाट भूभागावरील नीचांकी ६.८ अंश सेल्सिअस तापमान नोंदले गेले. उत्तर भारतात १८० नॉट्स वेगाने जोरदार वारे वाहत आहे. महाराष्ट्रातही जोरदार वारे वाहत आहेत. आग्नेय मध्य प्रदेशपासून विदर्भ, तेलंगणा, रायलसीमा ते तमिळनाडू पर्यंत हवेचा कमी दाबाचा पट्टा सक्रिय आहे. शनिवारपासून (ता. २४) विदर्भात पावसाला पोषक हवामान होण्याची शक्यता आहे.