Weather Update : वादळी पावसाचा अंदाज

Pune News : वादळी पावसाच्या सरी कोसळत असतानाच राज्यात उन्हाचा चटका असह्य होऊ लागला आहे. कमाल तापमानाचा पारा ४३ अंशाच्या पार गेला आहे. आज (ता. १९) कोकणात उष्ण व दमट हवामानाचा इशारा, तर मध्य महाराष्ट्र, मराठवाडा, विदर्भात तुरळक ठिकाणी विजांसह पावसाचा इशारा (येलो अलर्ट) देण्यात आला आहे.

दक्षिण विदर्भापासून मराठवाडा ते दक्षिण कर्नाटकपर्यंत हवेचा कमी दाबाचा पट्टा निवळून गेला आहे. मध्य महाराष्ट्र, मराठवाडा आणि विदर्भात तुरळक ठिकाणी वादळी पाऊस, हलक्या गारपिटीने हजेरी लावली आहे.

मध्य महाराष्ट्र, मराठवाड्यात ढगाळ हवामान असून, आज (ता. १९) मध्य महाराष्ट्रातील धुळे, नंदुरबार, नाशिक, मराठवाड्यातील नांदेड, विदर्भातील चंद्रपूर, गडचिरोली, वर्धा, यवतमाळ जिल्ह्यांत वादळी वारे, विजांसह पावसाचा इशारा देण्यात आला आहे.

गुरुवारी (ता. १८) सकाळपर्यंतच्या २४ तासांत मालेगाव आणि बीड येथे राज्यातील उच्चांकी ४३.२ अंश सेल्सिअस तापमानाची नोंद झाली. तर, जळगाव, सोलापूर, धुळे, वाशीम, अकोला येथे तापमान ४२ अंशाच्या वर आहे.

राज्यात बहुतांश ठिकाणी कमाल तापमानाचा पारा पुन्हा चाळीशीपार पोचला आहे. आज (ता. १९) कोकणात उष्ण व दमट हवामानाचा इशारा आहे. उर्वरित राज्यात ढगाळ हवामानासह उन्हाचा चटका, उकाडा कायम राहण्याची शक्यता आहे.

गुरुवारी (ता. १८) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३९.८, धुळे ४२.५, जळगाव ४२.८, कोल्हापूर ३६.७, महाबळेश्वर ३०.९, मालेगाव ४३.२, नाशिक ४०.६, निफाड ३९.७, सांगली ३९.५, सातारा ४०.१, सोलापूर ४२.६, सांताक्रूझ ३४.७, डहाणू ३७.१, रत्नागिरी ३३.८,

छत्रपती संभाजीनगर ४०.५, बीड ४३.२, नांदेड ४१.४, परभणी ४१.७, अकोला ४२.१, अमरावती ४०.८, बुलडाणा ४०.२, ब्रह्मपुरी ४०.८, चंद्रपूर ४१.४, गडचिरोली ४१.४, गोंदिया ३९.८, नागपूर ४०.२, वर्धा ४१.५, वाशीम ४२.२, यवतमाळ ४१.५.

- उष्ण व दमट हवामानाचा इशारा (येलो अलर्ट) :

ठाणे, मुंबई, रायगड, रत्नागिरी.

- वादळी पावसाचा इशारा (येलो अलर्ट) :

धुळे, नंदुरबार, नाशिक, नांदेड, चंद्रपूर, गडचिरोली, वर्धा, यवतमाळ.

४२ अंशांपेक्षा अधिक कमाल तापमान असलेली ठिकाणे :

मालेगाव ४३.२, बीड ४३.२, जळगाव ४२.८, सोलापूर ४२.६, धुळे ४२.५, वाशीम ४२.२, अकोला ४२.१.