Weather Update : राज्यात किमान तापमानात घट होण्याची शक्यता

Pune News : राज्याच्या दक्षिणेकडील जिल्ह्यांमध्ये तुरळक ठिकाणी वादळी पावसाने हजेरी लावली. पावसाला पोषक हवामान असल्याने किमान तापमानात वाढही झाली. शनिवारपासून (ता. १६) राज्यात पावसाची उघडीप मिळणार असून, किमान तापमानात पुन्हा घट होण्याचा अंदाज हवामान विभागाने वर्तविला आहे.

मन्नारचे आखात आणि श्रीलंका किनाऱ्याजवळ चक्राकार वाऱ्यांची स्थिती निवळून कोमोरिन भागापासून नैर्ऋत्य बंगालच्या उपसागरापर्यंत हवेचा कमी दाबाचा पट्टा सक्रिय आहे. शनिवारी (ता. १६) धुळे येथील कृषी महाविद्यालयात राज्यातील नीचांकी १३.६ अंश तापमानाची नोंद झाली. विदर्भातील ब्रह्मपुरी येथे किमान तापमान १५ अंशांवर होते. उर्वरित राज्याच्या किमान तापमानात वाढ झाली आहे.

राज्याच्या कमाल तापमानातही हळूहळू घट होत असल्याचे दिसून येत आहे. कमाल तापमानाचा पारा ३५ अंशांच्या खाली आला असून, शनिवारी (ता. १६) वाशीम येथे राज्यातील उच्चांकी ३४.६ अंश सेल्सिअस तापमानाची नोंद झाली.

तसेच सिंधुदुर्ग, रत्नागिरी, सातारा आणि सांगली जिल्ह्यांत तुरळक ठिकाणी हलक्या ते मध्यम पावसाने हजेरी लावली. आज (ता. १७) राज्यात ढगाळ हवामानासह कमाल तापमानात चढ- उतार होण्याची शक्यता आहे. तर किमान तापमानात २ ते ३ अंशांची घट होण्याचा अंदाज हवामान विभागाने वर्तविला आहे.

शनिवारी (ता. १६) सकाळी ८.३० वाजेपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३०.७ (२०.५), अहिल्यानगर ३०.९ (१९.७), धुळे - (१३.६), जळगाव ३३ (१७.३), कोल्हापूर २९.१ (२२.३), महाबळेश्‍वर २२.६ (१६.५), नाशिक ३१.७ (१६.८), निफाड ३० (१५.७), सांगली ३० (२२.२), सातारा २९.७ (२१.७), सोलापूर ३३ (२२.६), सांताक्रूझ ३३.६ (२३.२), डहाणू ३३.९ (२२.९), रत्नागिरी ३३.७ (२५.५),

छत्रपती संभाजीनगर ३१.४ (१७.४), धाराशिव - (२०.८), परभणी ३२.३ (१७.९), परभणी कृषी विद्यापीठ ३२.२ (१६.५), अकोला ३३.५ (१८), अमरावती ३३.६ (१६.५), बुलढाणा ३१.३ (१७.८), ब्रह्मपुरी ३३.८ (१५), चंद्रपूर ३०.८ (१५.५), गडचिरोली ३१.४ (१५.४), गोंदिया ३०.४ (१४.२), नागपूर ३१.६ (१५.९), वर्धा ३१.५ (१५.९), वाशीम ३४.६ (-), यवतमाळ ३२.२ (१६.५).

१५ अंशांपेक्षा कमी तापमान असलेली ठिकाणे :

धुळे १३.६, ब्रह्मपुरी १५.