Maharashtra Weather: उष्णता ठरतेय असह्य; राज्यातील बहुतांशी भागात तापमानात झाली मोठी वाढ

Pune News: राज्यातील पावसाचे वातावरण दूर झाले. तसे बहुतांशी भागात उन्हाचा चटका चांगलाच वाढला. विदर्भात तुलनेत तापमान अधिक दिसत आहे. मराठवाडा आणि मध्य महाराष्ट्रातही उन्हाचे प्रमाण वाढले आहे. दुपारी उन्हाचा चटका अधिक जाणवत असल्याने घराबाहेर पडणे अशक्य होत आहे.

राज्यात मागील दोन आठवडे वादळी पावसाचे वातावरण होते. त्यामुळे तापमानात काहीसे चढ उतारही झाले. सरासरी तापमान काहीसे कमी झाले होते. पण आता पावसाचे वातावरण निवळले.

त्यामुळे उन्हाचा चटका पुन्हा वाढला. विदर्भात भंडारा आणि गोंदीया वगळता इतर जिल्ह्यांमध्ये तापमानाने ४० अंशाचा टप्पा पार केला. तर अकोला येथे राज्यातील सर्वाधिक ४४.१ अंश सेल्सिअस तापमानाची नोंद झाली. यवतमाळमध्येही तापमान ४३.४ अंशावर पोचले होते. मध्य महाराष्ट्र आणि मराठवाड्यातही बहुतांशी भागात तापमान ४० अंशाच्या दरम्यान पोचले.

हवामान विभागाने आज अहिल्यानगर, जालना जिल्ह्यात काही ठिकाणी आज उष्ण आणि दमट हवामानाचा अंदाज दिला. तर परभणी, हिंगोली, नांदेड, लातूर, धाराशिव, पुणे, सोलापूर जिल्ह्यात आज आणि उद्या उष्ण आणि दमट हवामानाचा अंदाज देण्यात आला. तसेच सातारा आणि बीड जिल्ह्यात उद्या ऊन जास्त राहण्याचा अंदाज आहे.

चंद्रपूर जिल्ह्यात सोमवारी उष्णतेच्या लाटेचा इशारा देण्यात आला. तर अकोला जिल्ह्यात सोमवारी आणि मंगळवारी उष्णतेच्या लाटेचा इशाराही हवामान विभागाने दिला.