Maharashtra Monsoon Rain: विदर्भात पावसाचा जोर कमी होणार; मराठवाडा, मध्य महाराष्ट्रातही पावसाचे प्रमाण कमीच राहणार

Pune News: विदर्भातील अनेक भागात पावसाचा जोर आज कमी होता. आज आणि उद्या विदर्भातील काही भागात जोरदार पावसाचा अंदाज आहे. तर रविवारपासून विदर्भात पाऊस उघडीप देण्याची शक्यता आहे. मराठवाडा, मध्य महाराष्ट्र, खानदेश आणि कोकणातही पावसाचा जोर कमीच राहील, असा अंदाज हवामान विभागाने दिला.

दक्षिण झारखंड आणि परिसरावर असलेले चक्काकार वारे उत्तर छत्तीसगड आणि परिसपर्यंत वाहत आहेत. माॅन्सूनचा आस असलेला कमी दाबाचा पट्टा म्हणजेच माॅन्सून ट्रफ बिकानेर, देवमाली, हामिरपूर, दौलतोगंज, जमशेदपूर, दीघा ते ईशान्य बंगालच्या उपसागरापर्यंत आहे. त्यामुळे उत्तर प्रदेश, मध्य प्रदेश, छत्तीसगड, गुजरात तसेच महाराष्ट्राच्या काही भागात जोरदार सरी पडत आहेत. 

राज्यातील काही भागात पुढील ३ दिवस जोरदार पावसाचा अंदाज हवामान विभागाने दिला. विदर्भात आज आणि उद्या काही ठिकाणी जोरदार पावसाची शक्यता व्यक्त करण्यात आली. आज नागपूर, भंडारा, गोंदीया, चंद्रपूर आणि गडचिरोली जिल्ह्यात काही ठिकाणी जोरदार पावसाचा येलो अलर्ट हवामान विभागाने दिला. तसेच नाशिक, जालना आणि परभणी जिल्ह्यातही काही ठिकाणी मुसळधारेची शक्यता आहे.

मराठवाड्यातील इतर जिल्हे तसेच खानदेशातील तिन्ही जिल्ह्यांमध्ये काही ठिकाणी हलक्या ते मध्यम पावसाचा अंदाज देण्यात आला. मध्य महाराष्ट्र आणि कोकणातही काही ठिकाणी हलक्या ते मध्यम पावसाचा अंदाज देण्यात आला. उद्या विदर्भातील अमरावती, यवतमाळ, नागपूर, चंद्रपूर, भंडारा, गोंदीया आणि गडचिरोली जिल्ह्यात काही ठिकाणी जोरदार पावसाची शक्यता हवामान विभागाने व्यक्त केली.

जळगाव, छत्ररती संभाजीनगर आणि जालना जिल्ह्यातही काही ठिकाणी जोरदार पावसाचा येलो अलर्ट हवामान विभागाने दिला. मराठवाड्यातील इतर जिल्हे आणि खानेदशातही काही ठिकाणी हलक्या ते मध्यम पावसाचा अंदाज आहे. तर मध्य महाराष्ट्र आणि कोकणात उद्याही पावसाचा जोर कमीच राहणार आहे.  रविवारी नाशिक, नंदूरबार, धुळे तसेच रत्नागिरी जिल्ह्यात काही ठिकाणी जोरदार पावसाची शक्यता आहे.

तर विदर्भात पावसाची उघडीप राहणार आहे. मराठवाड्यात काही ठिकाणी हलक्या सरी पडतील. सोमवारी कोकण आणि मध्य महाराष्ट्राच्या घाट माथ्यावर काही ठिकाणी जोरदार पावसाची शक्यता आहे. खानदेश आणि मराठवाड्यात काही ठिकाणी हलक्या सरी पडतील. तर विदर्भात पावसाची उघडीप राहील, असा अंदाज हवामान विभागाने दिला.