Rain Forecast : पूर्व विदर्भात विजांसह पावसाचा इशारा

Pune News : राज्यात पावसाने उघडीप दिल्याने राज्यात उन्हाचा चटका आणि उकाड्यात वाढ झाली आहे. तुरळक ठिकाणी हलक्या ते मध्यम सरी पडत आहे. आज (ता. १३) पूर्व विदर्भात तुरळक ठिकाणी विजांसह पावसाचा इशारा (येलो अलर्ट) देण्यात आहे.

मध्य महाराष्ट्र, कोकणात हलक्या ते मध्यम पावसाची शक्यता आहे. उर्वरित राज्यात पावसाची मुख्यतः उघडीप राहण्याचा अंदाज हवामान विभागाने वर्तविला आहे. वायव्य मध्य प्रदेश आणि परिसरावर ४.५ किलोमीटर उंचीवर चक्राकार वाऱ्यांच्या स्थिती आहे.

त्यापासून आग्नेय अरबी समुद्रापर्यंत हवेचा कमी दाबाचा पट्टा तयार झाला आहे. मॉन्सूनचा आस राजस्थानच्या बिकानेरपासून, सिकार, ग्वालिअर, सिधी, दिघा ते ईशान्य बंगालच्या उपसागरापर्यंत सक्रिय आहे.

सोमवारी (ता. १२) सकाळपर्यंतच्या २४ तासांमध्ये राज्यात तुरळक ठिकाणी हलक्या ते मध्यम स्वरूपाचा पाऊस पडला. आज (ता. १३) राज्यात पाऊस उघडीप देणार असून, पूर्व विदर्भात विजांसह हलक्या पावसाची शक्यता आहे.

मध्य महाराष्ट्र आणि कोकणात तुरळक ठिकाणी हलक्या ते मध्यम पावसाची शक्यता हवामान विभागाने वर्तविली आहे.

विजांसह पावसाचा इशारा (येलो अलर्ट) :

भंडारा, गडचिरोली, चंद्रपूर.