Monsoon Rain: विदर्भात काही ठिकाणी पावसाचा अंदाज; राज्यातील बहुतांशी भागात पावसाचा जोर कमीच राहणार

Pune News: राज्यातील अनेक भागात मागील ४ दिवासांपासून पावसाची उघडीप आहे. पुढील ३ तीन दिवस राज्यातील बहुतांशी भागात पावसाचा जोर कमीच राहणार आहे. तर मंगळवारपासून विदर्भात पावसाचा जोर काहीसा वाढू शकतो, असा अंदाज हवामान विभागाने दिला आहे. 

हवामान विभागाने आज राज्यातील बहुतांशी भागात पावसाची उघडीप राहील, असा अंदाज दिला. तर विदर्भातील चंद्रपूर, भंडारा आणि गोंदीया जिल्ह्यात काही ठिकाणी जोरदार पावसाचा अंदाज दिला. तर विदर्भातील इतर जिल्हे, मराठवाडा, मध्य महाराष्ट्र आणि कोकणातील काही जिल्ह्यांमध्ये ढगाळ वातावरणासह काही ठिकाणी हलक्या ते मध्यम पावसाचा अंदाज दिला. 

उद्या विदर्भातील नागपूर, भंडारा, गोंदीया, चंद्रपूर आणि गडिचिरोली जिल्ह्यात काही ठिकाणी जोरदार पावसाचा येलो अलर्ट देण्यात आला. तर सिंधुदूर्ग, रत्नागिरी, कोल्हापूर, सातारा, सोलापूर, सांगली, धाराशिव, लातूर आणि नांदेड जिल्ह्यात तसेच नाशिक, धुळे आणि नंदूरबार जिल्ह्यात काही ठिकाणी ढगाळ हवामानासह हलक्या ते मध्यम पावसाचा अंदाज देण्यात आला. तर राज्यातील इतर जिल्ह्यांमध्ये ढगाळ हवामानासह काही ठिकाणी हलक्या पावसाचा अंदाज आहे. 

रविवारी विदर्भातील अमरावती, नागपूर, वर्धा, भंडारा आणि गोंदीया तेसच मराठवाड्यातील लातूर, नांदेड आणि परभणी जिल्ह्यात काही ठिकाणी जोरदार पावसाचा अंदाज हवामान विभगााने दिला. तर कोकण आणि मध्य महाराष्ट्रातील काही ठिकाणी हलक्या ते मध्यम पावसाचा अंदाज आहे. तर सोमवारी विदर्भ, मराठवाडा आणि मध्य महाराष्ट्रातील काही भागात जोरदार पावसाचा अंदाज देण्यात आला. 

मंगळवारी विदर्भात पावसाचा जोर वाढण्याची शक्यता आहे. अमरावती वगळता इतर सर्व जिल्ह्यांमध्ये काही ठिकाणी जोरदार पावसाचा येलो अलर्ट हवामान विभागाने दिला. तसेच मराठवाड्यातील सोलापूर, धाराशिव, लातूर आणि नांदेड जिल्ह्यात काही ठिकाणी जोरदार पावसाचा अंदाज हवामान विभागाने दिला. कोकण, मध्य महाराष्ट्रातही काही ठिकाणी ढगाळ वातावरणासही हलक्या ते मध्यम पावसाचा अंदाज हवामान विभागाने दिला.