Monsoon Rain : पुढील ५ दिवस पावसाचा अंदाज; विदर्भात आणि कोकणात दोन दिवस पावसाचा जोर वाढण्याचा अंदाज

Pune News : राज्यातील अनेक भागात मागील तीन दिवसांपासून पावसाचा जोर काहीसा कमी झालेला आहे. मात्र हवामान विभागाने पुढील ५ दिवस राज्यातील काही भागात जोरदार तर अनेक भागात हलक्या ते मध्यम पावसाचा अंदाज दिला. 

हवामान विभागाने पुढील ५ दिवस कोकणात बहुतांशी ठिकाणी जोरदार ते मध्यम पावसाचा अंदाज दिला. मध्य महाराष्ट्रातही पहिले ३ दिवस बहुतांशी ठिकाणी आणि नंतर काही ठिकाणी जोरदार पावसाचा अंदाज आहे. तर मराठवाडा आणि विदर्भातही अनेक ठिकाणी पुढील ७ दिवस पाऊस पडेल असा अंदाज हवामान विभागाने दिला. 

उद्या हवामान विभागाने कोल्हापूर जिल्ह्याला बहुतांशी ठिकाणी जोरदार ते अति जोरदार पावसाचा रेड अलर्ट दिला. तर सिंधुदूर्ग, रत्नागिरी, रायगड, पुणे आणि सातारा जिल्ह्यात काही ठिकाणी जोरदार पावसाचा ऑरेंज अलर्ट हवामान विभागाने दिला.

तर विदर्भातील सर्वच जिल्हे तसेच जालना, परभणी, हिंगोली आणि नांदेड जिल्ह्यात काही ठिकाणी जोरदार पावसाचा येलो अलर्ट देण्यात आला. मराठवाड्यातील इतर भागात आणि खानदेशात काही ठिकाणी हलक्या ते मध्यम पावसाचा अंदाजही हवामान विभागाने दिला.

शनिवारी राज्यातील बहुतांशी भागात पावसाचा अंदाज हवामान विभागाने दिला. सातारा जिल्ह्यात अतिजोरदार पावसाचा रेड अलर्ट देण्यात आला. तर संपूर्ण कोकण आणि पुणे तसेच नाशिक जिल्ह्यात काही अनेक ठिकाणी जोरदार पावसाचा ऑरेंज अलर्ट देण्यात आला. तर संपूर्ण विदर्भ, नगर, बीड, छत्रपती संभाजीनगर, जालना, परभणी, हिंगोली आणि नांदेड जिल्ह्यात काही ठिकाणी जोरदार पावसाचा येलो अलर्ट देण्यात आला. 

रविवारी आणि सोमवारी विदर्भ तसेच मराठवाड्यात पावसाचा जोर कमी राहण्याचा अंदाज हवामान विभागाने दिला. तर कोकण, मध्य महाराष्ट्राचा घाटमाथा, नाशिक, धुळे, जळगाव आणि नंदूरबार जिल्ह्यात काही ठिकाणी जोरदार पावसाचा अंदाज आहे.