Maharashtra Rain Alert : काही भागात तीन दिवस पावसाचा अंदाज; राज्यातील तापमानात चढ उतार व्हायला सुरुवात

Pune News : राज्यात सध्या तापमानात चढ उतार दिसून येत आहेत. किमान आणि कमाल तापमानात बदल होत आहे. तर आजपासून तीन दिवस राज्यच्या काही भागात पावसाचा अंदाज हवामान विभागाने दिला. 

राज्यात सध्या सकाळी हवेत गारवा जाणवत आहे. तर दुपारी उन्हाचा चटका जाणवत आहे. वातावरणातील या बदलामुळे राज्याला थंडीची चाहूल लागली. तसेच हवामान विभागाने आजपासून पुढील तीन दिवस राज्यातील काही भागात हलक्या ते मध्यम पावसाचा अंदाज दिला. 

हवामान विभागाने आज कोकणातील सिंधुदूर्ग, रत्नागिरी आणि रायगड तर मध्य महाराष्ट्रातील पुणे, सातारा, कोल्हापूर, सांगली, सोलापूर तसेच मराठवाड्यातील धाराशिव, लातूर आणि नांदेड आणि विदर्भातील चंद्रपूर, गडचिरोली आणि गोंदीया जिल्ह्यात काही ठिकाणी विजांसह हलक्या ते मध्यम पावसाचा येलो अलर्ट दिला. तर ठाणे, नाशिक, नगर, बीड, परभणी, हिंगोली जिल्ह्यात काही ठिकाणी विजांसह हलक्या पावसाचा अंदाज आहे. 

उद्या कोकणातील सिंधुदूर्ग, रत्नागिरी आणि रायगड तर मध्य महाराष्ट्रातील पुणे, सातारा, कोल्हापूर, सांगली, सोलापूर तसेच मराठवाड्यातील धाराशिव, लातूर आणि नांदेड जिल्ह्यात काही ठिकाणी विजांसह हलक्या ते मध्यम पावसाचा अंदाज दिला. तसेच ठाणे, नगर, बीड, परभणी आणि हिंगोली जिल्ह्यात काही ठिकाणी हलक्या पावसाची शक्यता आहे. 

शुक्रवारी कोकणातील सिंधुदूर्ग, रत्नागिरी, पुणे, सातारा आणि कोल्हापूर जिल्ह्यात काही ठिकाणी विजांसह हलक्या ते मध्यम पावसाचा येलो अलर्ट दिला. तसेच रायगड, ठाणे, सातारा, सांगली, सोलापूर, नगर, बीड, धाराशिव, लातूर आणि नांदेड जिल्ह्यातही हलक्या पावसाचा अंदाज आहे.