Monsoon : मॉन्सून परतीचा प्रवास अडखळला ; राज्यात हलक्या ते मध्यम पावसाचा अंदाज

Monsoon back : राज्यात पावसाला पोषक स्थिती असल्यामुळे अनेक भागात मागील चार दिवसापासून पावसाच्या मध्यम ते जोरदार सरी हजेरी लावत आहे. हवामान विभागाने शुक्रवार आणि शनिवारी राज्यातील कोकण, मराठवाडा, विदर्भ, मध्य महाराष्ट्रासह खानदेशातील काही जिल्ह्यात मध्यम ते जोरदार पावसाचा इशारा म्हणजेच येलो अलर्ट दिला आहे.

गुरुवारी संध्याकाळी राज्यात विविध भागात हलक्या ते मध्यम पावसाने हजेरी लावली. हवामान विभागाने आज कोकणातील पालघर, ठाणे, मुंबई, रायगड रत्नागिरी जिल्ह्यात काही ठिकाणी मध्यम पावसाचा तर सिंधुदुर्ग जिल्ह्याला जोरदार पावसाचा ऑरेंज अलर्ट जारी केला. 

मराठवाड्यातील छत्रपती संभाजीनगर, जालना, बीड, धाराशिव, परभणी, लातूर, नांदेड, हिंगोली जिल्ह्यासह विदर्भातील अकोला, अमरावती, भंडारा, बुलढाणा, चंद्रपुर, गडचिरोली, गोंदिया, नागपूर, वर्धा, यवतमाळ, वाशिम जिल्हयात काही ठिकाणी वीजा ढगांच्या गडगडाटासह हलक्या ते मध्यम पावसाचा इशारा दिला. तर मध्य महाराष्ट्रातील अहमदनगर, सोलापूर, नाशिक, कोल्हापुर, जिल्हयासह सातारा, सांगली जिल्ह्यात तुरळक ठिकाणी मध्यम पावसाचा अंदाज हवामान विभागाने वर्तवला आहे.

सोमवारी मॉन्सून परतीचा प्रवास सुरू केल्याचं हवामान विभागाने जाहीर केलं. परंतु मागील चार दिवसांपासून मॉन्सून परतीची सीमा जैसे थे आहे. मॉन्सूननं राजस्थानमधील नौखरा, जोधपूर, बारमेर भागातून माघार घेतली आहे. दक्षिण कोकण-गोवा किनार्‍यापासून पूर्वमध्य अरबी समुद्रावर कमी दाबाचे क्षेत्र सक्रिय आहे. तर दुसरे कमी दाबाचे क्षेत्र ईशान्य आणि लगतच्या पूर्वमध्य उपसागरावर आहे. त्यामुळे आज आणि उद्या राज्यात पावसाची शक्यता आहे. तर रविवारपासून पावसाची उघडीप राहण्याचा अंदाज हवामान विभागाने दिला आहे.