Monsoon Update 2023 : माॅन्सूनची चाल मंदावली; चक्रीवादळ देशातच धडकणार

Weather Update in Maharashtra : देशातील काही भागांमध्ये काल माॅन्सूनने प्रगती केली होती. पण आज माॅन्सूनचा प्रवास कालच्याच जागेवर होता. आज माॅन्सूनने प्रगती केली नाही. तर दुसरीकडे बिपरजाॅय चक्रीवादळामुले गुजरात आणि राजस्थानमधील काही भागांमध्ये वादळी वाऱ्यासह पाऊस पडत आहे.

तर १५ जूनला सायंकाळी हे वादळ गुजरातमधील जखाऊ बंदराजवळ धडकण्याची शक्यता आहे, असा अंदाज हवामान विभागाने व्यक्त केला.

मॉन्सून ८ जून रोजी देशाच्या मुख्य भूमीचे प्रवेशद्वार असलेल्या केरळमध्ये डेरेदाखल झाला होता. त्यानंतर माॅन्सूनने मजल दरमजल करत प्रवास सुरु केला. साधारणतः ७ जूनपर्यंत तळकोकणात येणारा मॉन्सून यंदा चार दिवस उशिराने दाखल झाला. बिपरजाॅय चक्रीवादळाचाही माॅन्सूनवर परिणाम होत आहे.

माॅन्सूनने काल कोकण, कर्नाटक, तमिळनाडू, आंध्र प्रदेश, पश्चिम बंगालमध्ये प्रगती केली होती. पण आज माॅन्सूनने प्रगती केली नाही. माॅन्सून कालच्याच ठिकाणावर आज ठाण मांडून होता. आजही माॅन्सूनची सिमा रत्नागिरी, कोप्पाल, पुट्टापारथी, श्रीहरीकोटा, मालदा आणि फोरबेसगंज या भागात होती.

चक्रीवादळ गुजरातमध्ये धडकणार

बिपरजाॅय चक्रीवादळाची तीव्रता वाढली आहे. चक्रीवादळ देवभुमी द्वारकेपासून ईशान्येला २८० किलोमीटर, पोरबंरच्या वायव्यला ३०० किलोमीटर, जखाऊ बंदराच्या वायव्येला ३१० किलोमीटर आणि पाकिस्तानमधील कराचीच्या ४५० किलोमीटर अंतरावर आहे. बिपरजाॅय चक्रीवादळ आज रात्री उत्तरेकडे सरकण्याची शक्यता आहे.

त्यानंतर हे चक्रीवादळ १५ जूनला सायंकाळी गुजरातमधील मांडवी आणि पाकिस्तानमधील कराची यांच्या लगतच्या जखाऊ बंदराजवळ धडकण्याची शक्यता आहे. जखाऊ बंदर हे गुजरातमध्ये आहे. यावेळी १५० किलोमीटर प्रतितास वेगाने वारे वाहतील, असा अंदाजही हवामान विभागाने व्यक्त केला.