Pune News : नैर्ऋत्य मोसमी वाऱ्यांच्या (मॉन्सून) हंगामात (जून ते सप्टेंबर) देशात यंदा सरासरीपेक्षा अधिक म्हणजेच १०६ टक्के पाऊस पडण्याचा सुधारित अंदाज भारतीय हवामान विभागाने जाहीर केला आहे. या अंदाजात चार टक्क्यांची कमी अधिक तफावत गृहीत धरण्यात आली आहे. पावसाच्या पाण्यावर शेती अवलंबून असलेल्या भागात (मॉन्सून कोअर झोन) यंदा सरासरीपेक्षा अधिक १०६ टक्क्यांपेक्षा अधिक पावसाची शक्यता वर्तविण्यात आली आहे.
नवी दिल्ली येथे आयोजित पत्रकार परिषदेत पृथ्वी विज्ञान मंत्रालयाचे सचिव डॉ. एम. रविचंद्रन आणि हवामान विभागाचे महासंचालक डॉ. मृत्युंजय मोहपात्रा यांनी मॉन्सून हंगामातील पावसाचा सुधारित दीर्घकालीन अंदाज मंगळवारी (ता.२७) जाहीर केला. हवामान विभागाने जाहीर केलेल्या पहिल्या दीर्घकालीन अंदाजात देशभरात १०५ टक्के पाऊस पडण्याची शक्यता वर्तविण्यात आली होती. १९७१ ते २०२० कालावधीत देशाची मॉन्सून पावसाची सरासरी ८७ सेंटिमीटर म्हणजेच ८६८.६ मिलिमीटर आहे. तर, सरासरीच्या ९६ ते १०४ टक्के पाऊस सर्वसाधारण मानला जातो.
सुधारित अंदाजानुसार, मॉन्सूनमध्ये सरासरीपेक्षा अधिक पाऊस पडण्याची शक्यता सर्वाधिक (३२ टक्के), तर दुष्काळाची शक्यता अवघी २ टक्के असल्याचे या वेळी स्पष्ट करण्यात आले. यंदा मॉन्सून हंगामात देशात पावसाचे वितरण चांगले राहण्याची शक्यता आहे. प्रमुख विभागनिहाय पावसाचे वितरण लक्षात घेता ईशान्य भारतात यंदा कमी पावसाची शक्यता अधिक आहे. देशाच्या उर्वरित भागात सरासरीपेक्षा अधिक पावसाची शक्यता अधिक आहे.
विषुववृत्तीय प्रशांत महासागराचे तापमान सरासरी वर असून, सध्या तटस्थ स्थिती म्हणजेच ‘ला-निना’ नाही, आणि ‘एल-निनो’ नाही अशी स्थिती आहे. मॉन्सून हंगामात ही तटस्थ स्थिती कायम राहण्याची शक्यता आहे. बंगालचा उपसागर आणि अरबी समुद्रातील तापमानाचा फरक (इंडियन ओशन डायपोल - आयओडी) सध्या तटस्थ स्थितीत आहे. मॉन्सून हंगामाच्या दुसऱ्या टप्प्यात आयओडी ‘ऋण’ होण्याची शक्यता असली तरी त्याचा प्रभाव राहणार नाही.
हवामान विभागनिहाय पावसाचा अंदाज :
विभाग---अंदाज
वायव्य भारत---९२-१०८ टक्के
मध्य भारत---१०६ टक्क्यांपेक्षा अधिक
दक्षिण भारत---१०६ टक्क्यांपेक्षा अधिक
ईशान्य भारत---९४ टक्क्यांपेक्षा कमी
जून महिन्यात पाऊस सरासरी ओलांडणार
जून महिन्यात देशात यंदा सरासरीपेक्षा अधिक पावसाचा (१०८ टक्के) अंदाज हवामान विभागाने वर्तविला आहे. दक्षिण द्वीपकल्प, मध्य भारतासह वायव्य आणि ईशान्य भारताच्या काही वगळता उर्वरित देशात यंदा चांगल्या पावसाची शक्यता आहे. जून महिन्यात महाराष्ट्राच्या बहुतांशी भागात सरासरी ते सरासरीपेक्षा अधिक पावसाची शक्यता आहे. उत्तर महाराष्ट्रात पावसाचे प्रमाण अधिक असण्याचे संकेत हवामान विभागाने दिले आहेत.
महाराष्ट्रात दमदार पावसाचे संकेत
मॉन्सून हंगामात महाराष्ट्रात यंदाही दमदार पावसाचा अंदाज आहे. महाराष्ट्रासह मॉन्सून कोअर झोनमध्ये सरासरीपेक्षा जास्त (१०६ टक्क्यांपेक्षा अधिक) पाऊस पडण्याची शक्यता आहे. कोकण, मध्य महाराष्ट्र, मराठवाडा आणि पश्चिम विदर्भात पावसाचे प्रमाण अधिक राहण्याची शक्यता आहे. पूर्व विदर्भातही चांगला पाऊस पडण्याची शक्यता वर्तविण्यात आली आहे.
प्रथमच विभागवार अंदाज जाहीर
हवामान विभागाने यंदा प्रथमच हंगामी पावसाचा विभागवार अंदाज दिला आहे. देशात ३६ प्रमुख हवामान विभाग असून, यात महाराष्ट्रातील कोकण, मध्य महाराष्ट्र, मराठवाडा आणि विदर्भ विभागाचा समावेश आहे. या चारही विभागात यंदा चांगल्या
पावसाची शक्यता आहे. प्रत्येक विभागासाठी हंगाम अंदाज जाहीर करण्याचा ऐतिहासिक निर्णय असला तरी, कमी क्षेत्रावरील अंदाजांची अचूकता कमी असते. मात्र त्यातील सुधारणांबाबत प्रयत्न केले जातील, असे डॉ. मोहपात्रा यांनी सांगितले.
महाराष्ट्राचा विभागवार अंदाज
विभाग---अंदाज---सरासरी पाऊस,(१९७१-२०२०)
कोकण-गोवा---१०७ टक्क्यांपेक्षा अधिक---२८७१ मिमी
मध्य महाराष्ट्र---११० टक्क्यांपेक्षा अधिक---७४७ मिमी
मराठवाडा---११२ टक्क्यांपेक्षा अधिक---६४३ मिमी
विदर्भ---१०९ टक्क्यांपेक्षा अधिक---९३७ मिमी
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.