Rain Forecast : कोकण, घाटमाथा, विदर्भात जोरदार पावसाचा इशारा

Weather Update Pune : पूर्व किनारपट्टीवरील कमी दाब क्षेत्राच्या प्रभावामुळे विदर्भासह राज्यात पावसाने हजेरी लावली आहे. आज (ता. २८) कोकण, घाटमाथा, आणि विदर्भात जोरदार पावसाचा इशारा देण्यात आला आहे. ठाणे, रायगड, रत्नागिरी, पुणे, सातारा जिल्ह्यांचा घाटमाथा, विदर्भातील भंडारा, गोंदियामध्ये जोरदार पावसाचा ‘ऑरेंज अलर्ट’ हवामान विभागाने दिला आहे.

मॉन्सूनचा आस असलेला कमी दाबाचा पट्टा काहीसा दक्षिणेकडे सरकला आहे. राजस्थानच्या जैसलमेर, कोटा, रायसेन, दुर्ग, कमी दाब क्षेत्राचे केंद्र ते पूर्व-मध्य बंगालच्या उपसागरापर्यंत सक्रिय असलेल्या मॉन्सूनचा आस उत्तरेकडे जाण्याचे संकेत आहे. महाराष्ट्राच्या दक्षिण भागातून असलेले पूर्व-पश्चिम वाऱ्यांचे जोडक्षेत्र समुद्र सपाटीपासून ४.५ ते ७.६ किलोमीटर उंचीवर सक्रिय आहे.

कोकण, घाटमाथ्यासह विदर्भात जोरदार पावसाने तडाखा दिला आहे. धरणांच्या पाणलोट क्षेत्रातही संततधार सुरू आहे. उर्वरित राज्यात हलक्या ते मध्यम सरी कोसळत आहेत. आज (ता. २८)ठाणे, रायगड, रत्नागिरीसह पुणे, सातारा जिल्ह्यांचा घाटमाथा, विदर्भातील भंडारा, गोंदिया जिल्ह्यात जोरदार पावसाचा ‘ऑरेंज अलर्ट’ आहे. तर उर्वरित विदर्भ, कोकण, कोल्हापूर जिल्ह्यात विजांसह जोरदार पावसाचा इशारा (येलो अलर्ट) हवामान विभागाने दिला आहे.

कमी दाबाचे क्षेत्र निवळतेय

बंगालच्या उपसागरात तयार झालेल्या ठळक कमी दाबाचे क्षेत्राची तीव्रता कमी होऊ लागली आहे. उत्तर आंध्र प्रदेश आणि दक्षिण ओडिशा परिसरावर कमी दाबाचे क्षेत्र सक्रिय आहे. त्याला लागूनच समुद्र सपाटीपासून ७.६ किलोमीटर उंचीवर चक्राकार वारे वाहत आहेत.

जोरदार पावसाचा इशारा (ऑरेंज अलर्ट) :

ठाणे, रायगड, रत्नागिरी, गोंदिया, भंडारा.

जोरदार पाऊस / विजांसह पावसाचा इशारा (येलो अलर्ट) :

पालघर, सिंधुदुर्ग, बुलडाणा, अकोला, अमरावती, वाशीम, यवतमाळ, वर्धा, नागपूर, चंद्रपूर, गडचिरोली.