Rain Update : कोकण, घाटमाथ्यावर संततधार सुरूच

Rain Update Pune : मॉन्सूनच्या पावसाच्या सरी कोसळत असल्याने कोकण, घाटमाथ्यावर पावसाची संततधार कायम आहे. शनिवारी (ता. १)सकाळी ८.३० वाजेपर्यंतच्या २४ तासांत रायगड, रत्नागिरी आणि ठाणे जिल्ह्यांत अनेक ठिकाणी अतिवृष्टी झाली. घाटमाथ्यावरील ताम्हिणी आणि शिरगाव येथे सर्वाधिक २१० मिलिमीटर पावसाची नोंद झाली.

कोकण, घाटमाथ्यावर जोरदार पाऊस असला, तरी सह्याद्रीच्या पूर्व उतारावर असलेल्या मध्य महाराष्ट्राच्या पश्‍चिम तालुक्यांत हलक्या ते मध्यम पावसाने हजेरी लावली. उर्वरित तालुक्यांत पावसाची उघडीप आहे.

विदर्भ आणि मराठवाड्यात पाऊस ओसरला आहे. पेरणीयोग्य पाऊस झालेल्या भागात पेरण्या सुरू होणार आहेत. कोकणात भात लावणीच्या कामांना वेग आला आहे. धरणांच्या पाणलोट क्षेत्रात सुरू असलेल्या पावसाने धरणांच्या पाणीसाठ्यात वाढ होण्यास सुरुवात झाली आहे.

शनिवारी सिंधुदुर्ग जिल्ह्यात पावसाच्या जोरदार सरी कोसळल्या. मुंबईत पावसाच्या जोरदार हजेरी लावली. पुणे जिल्ह्याच्या पश्‍चिम पट्ट्यात पावसाच्या हलक्या ते मध्यम सरी येत राहिल्या. तर पूर्व भागात तुरळक पाऊस झाला. कोल्हापूर जिल्ह्यात पश्‍चिमेकडे पावसाची रिपरिप राहिली. सांगली जिल्ह्यात पाऊस झाला नाही.

परभणी, हिंगोली जिल्ह्यांसह अकोला, बुलडाणा, नागपूर जिल्ह्यांत पावसाने उघडीप दिली. छत्रपती संभाजीनगरमध्ये दुपारी दहा मिनिटे पाऊस झाला. जळगाव, धुळे जिल्ह्यांत दुपारी १५ ते २० मिनिटे मध्यम पाऊस झाला. नगर जिल्ह्यात पावसाने उघडीप दिली. नाशिक जिल्ह्यात इगतपुरी, त्र्यंबकेश्‍वर, सुरगाणा व पेठ तालुक्यांत संततधार सुरूच होती. नाशिकच्या पूर्व भागात मात्र पावसाची प्रतीक्षा कायम आहे.

- सिंधुदुर्गात पावसाच्या जोरदार सरी

- मुंबईत पावसाच्या सरींवर सरी

- पुणे, कोल्हापूरच्या पश्‍चिम भागात पाऊस

- सांगली जिल्ह्यात पावसाची उघडीप

- छत्रपती संभाजीनगर, जळगाव, धुळ्यात हजेरी

- परभणी, हिंगोली जिल्ह्यांत उघडीप आहे.

- अकोल्यात पावसाची दडी

शनिवारी (ता. १) सकाळपर्यंतच्या २४ तासांतील पाऊस (मिलिमीटरमध्ये) (स्रोत - हवामान विभाग) :

कोकण : मंडणगड, माथेरान प्रत्येकी १९०, ठाणे १६०, पेण १५०, खालापूर १४०, कर्जत १३०, शहापूर, मुरबाड, राजापूर प्रत्येकी १२०, विक्रमगड, सांताक्रुझ, माणगाव प्रत्येकी ११०, पनवेल १००, म्हसळा, महाड, अंबरनाथ, रत्नागिरी, दापोली, उल्हासनगर, उल्हासनगर, पालघर, वाकवली, जव्हार प्रत्येकी ९०, भिरा, तळा, लांजा, मोखेडा प्रत्येकी ८०, देवगड, चिपळूण, भिवंडी, हर्णे, सुधागड पाली, खेड, गुहागर, वैभववाडी, वाडा प्रत्येकी ७०.

मध्य महाराष्ट्र : लोणावळा १५०, ओझरखेडा १४०, हर्सूल ११०, पेठ १००, महाबळेश्‍वर, गगनबावडा प्रत्येकी ९०, इगतपुरी, त्र्यंबकेश्‍वर प्रत्येकी ७०, पौड ६०, शाहूवाडी ४०, अक्कलकुवा, वडगाव मावळ, मुल्हेर, चंदगड, आजरा, घोडेगाव, पिंपळगाव बसवंत, नवापूर, वेल्हे, तळेगाव प्रत्येकी ३०.

विदर्भ : आष्टी, चिखलदरा, काटोल, दर्यापूर प्रत्येकी १०.

घाटमाथा : ताम्हिणी, शिरगाव प्रत्येकी २१०, डुंगेरवाडी १७०, खोपोली १६०, दावडी, लोणावळा, खंद प्रत्येकी १४०, वळवण, भिवपुरी १३०, अंबोणे १२०, कोयना नवजा, वाणगाव प्रत्येकी ११०, शिरोटा, ठाकूरवाडी प्रत्येकी १००.

मुंबईला पाणीपुरवठा करणारे तलाव :

तुलसी १५०, विहार, १२०, भातसा ११०, ऊर्ध्व वैतरणा ८०, वैतरणा ७०.