Maharashtra Rain Update : राज्यात हलक्या पावसाचा अंदाज कायम

Weather Update Pune : पावसाची दडीने राज्यात उन्हाच्या झळा तापदायक ठरत आहेत. ढगाळ हवामानामुळे उकाड्यातही वाढ झाली आहे. आज (ता. १) राज्यात तुरळक ठिकाणी विजांसह हलक्या पावसाची शक्यता हवामान विभागाने वर्तविली आहे. पावसात मोठा खंड पडल्याने अनेक भागात पावसाची प्रतिक्षा कायम आहे.

मॉन्सूनचा आस असलेला कमी दाबाचा पट्टा हिमालयाच्या पायथ्याकडे टिकून आहे. ईशान्य बंगालच्या उपसागरात समुद्र सपाटीपासून ५.८ किलोमीटर उंचीवर, आंध्र प्रदेशच्या किनाऱ्यालगत ९०० मीटर उंचीवर, पूर्व उत्तर प्रदेश आणि बिहारमध्ये ३.१ ते ४.५ किलोमीटर उंचीवर चक्राकार वाऱ्यांच्या स्थिती आहेत.

राज्यात पावसाने उघडीप दिली असून, कमाल तापमानात वाढ झाली आहे. दुपारच्या वेळी घराबाहेर पडणे तापदायक ठरत आहे. दुपारनंतर ढगाळ हवामान होत असून, ऐन पावसाळ्यात उन्हाच्या झळा वाढल्याने चांगलाच घामटा निघत आहे.

आज (ता. १) कोकण, मध्य महाराष्ट्र, मराठवाड्यात तुरळक ठिकाणी विजांसह पावसाची शक्यता आहे. उर्वरित राज्यात मुख्यतः उघडिप राहण्याचा अंदाज हवामान विभागाने वर्तविला आहे.