Cold Weather Update : राज्यात हुडहुडी कायम राहणार

Pune News : उत्तरेकडील थंड वाऱ्यांनी महाराष्ट्राकडे धाव घेतल्याने राज्यात गारठा चांगलाच वाढला आहे. मध्य महाराष्ट्र, मराठवाड्यात अनेक ठिकाणी तापमानाचा पारा १० अंशांच्या खाली घसरल्याने हुडहुडी वाढली आहे.

निफाड येथील गहू संशोधन केंद्रात राज्यातील नीचांकी ७.४ अंश सेल्सिअस तापमानाची नोंद झाली. आज (ता. १७) राज्यात थंडी कायम राहण्याचा अंदाज हवामान विभागाने वर्तविला आहे.

उत्तर भारतात थंडीचा कडाका कायम असून, मंगळवारी (ता. १६) हरियानाच्या हिस्सार येथे देशाच्या सपाट भूभागावरील नीचांकी १.१ अंश सेल्सिअस तापमान नोंदले गेले. पंजाब, हरियाना, चंडीगड, दिल्ली, उत्तर प्रदेश, बिहारसह उत्तर भारतात धुक्याचे साम्राज्य कायम आहे. पंजाब, हरियाना, चंडीगड, दिल्लीसह उत्तरेकडील राज्यात थंडीची लाट कायम राहण्याची शक्यता आहे.

राज्यात थंडीचा कडाका वाढला असून, निफाडपाठोपाठ धुळे येथील कृषी महाविद्यालयात ८ अंश सेल्सिअस तापमान नोंदले गेले, तर छत्रपती संभाजीनगर, जळगाव, नगर, नाशिक येथे तापमान १० अंशांपेक्षा खाली आले आहे. राज्यात किमान तापमानाचा पारा ९ ते १६ अंशांच्या दरम्यान आहे. राज्यात किमान तापमानातील घट कायम राहून गारठा वाढण्याची शक्यता हवामान विभागाने वर्तविली आहे.

मंगळवारी (ता. १६) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३२.१ (१०.८), नगर २८.८ (९.६), धुळे २८.५ (८), जळगाव ३०.४ (९.४), कोल्हापूर ३१.७ (१६.९), महाबळेश्‍वर २६.८ (१४.७), नाशिक २९.३ (९.८), निफाड २८.८ (७.४), सांगली ३२.१ (१५.८), सातारा ३१.३ (१२.४), सोलापूर ३३.७ (१४.५), सांताक्रूझ ३१.३ (१६.२), डहाणू २८.३ (१५.५), रत्नागिरी ३२.६ (१६.३),

छत्रपती संभाजीनगर २९.२ (९.२), नांदेड ३०.२ (१४), परभणी ३०.६ (१३.५), अकोला ३०.६ (१२.३), अमरावती २९.४ (१३.५), बुलडाणा २८.५ (१२.६), ब्रह्मपुरी ३२.६ (१५.८), चंद्रपूर ३०.६ (१४.४), गडचिरोली ३१.४ (१४.२), गोंदिया २९.८ (१२.४), नागपूर ३० (१४.२), वर्धा ३१ (१४), वाशीम ३२.४ (१४.०), यवतमाळ ३२ (११.५).