Weather Update : रत्नागिरीत सर्वत्र ढगाळ वातावरण

Ratnagiri News : तमिळनाडूच्या फेंगल या चक्रीवादळामुळे हवामानात पूर्णपणे बदल होऊन थंडीचे प्रमाण कमी झाले आहे. सलग दुसऱ्या दिवशी जिल्ह्यात सर्वत्र दुपारपर्यंत संपूर्ण परिसरात ढगाळ वातावरण होते. त्यामुळे हापूसच्या मोहरासह पालवीवर कीडरोग आणि तुडतुड्याचा प्रादुर्भाव होण्याची भीती व्यक्त केली जात आहे.

तसेच दापोली येथील डॉ. बाळासाहेब सावंत कोकण कृषी विद्यापीठाच्या गिम्हवणे येथील हवामान विभागाने पुढील दोन दिवसांत हलक्या स्वरूपाच्या पावसाच्या सरी पडण्याची शक्यता वर्तविली आहे.

मागील आठवड्यात पारा अगदी ११ वरून ८.८ अंश सेल्सिअसवर आला होता. संपूर्ण जिल्ह्यात हुडहुडी भरली होती. आंबा, काजू बागायतदार सुखावले होते. मोहर फुटायला सुरुवातही झाली होती. परंतु वातावरणातील बदलाने किमान तापमानात वाढ होऊ लागली आहे.

सोमवारी १३ अंश सेल्सिअन तापमान नोंद झाले आहे. त्यामुळे हवेतील उष्मा वाढला आहे. जिल्ह्यात पुढील ३ दिवस ढगाळ वातावरण राहण्याची शक्यता व्यक्त केली गेली आहे. बदललेल्या वातावरणात शेतकऱ्यांनी वेळीच पिकांची काळजी घेणे गरजेचे आहे, असा संदेश कोकण कृषी विभागाकडून देण्यात आला आहे.

ढगाळ वातावरण आणि वाढलेली आर्द्रता यामुळे आंबा पिकावर तुडतुड्यांचा प्रादुर्भाव होण्याची शक्यता वर्तविली जात आहे. तुडतुड्यांमुळे हापूस उत्पादनावर परीणाम होऊ शकतो. त्यासाठी बागायतदारांना कीटकनाशक फवारणीचा हात द्यावा लागणार आहे.