![Rain Forecast](http://media.assettype.com/agrowon%2F2023-04%2Fc246980e-6f6b-4934-97a1-b087e638b54f%2FMahesh_News_Story___2023_04_14T161424_516.png?rect=0%2C0%2C1200%2C675&w=480&auto=format%2Ccompress&fit=max)
Pune News : बंगालच्या उपसागरातील ‘मिगजौम’ चक्रीवादळामुळे राज्यात ढगाळ आकाशासह पावसाला पोषक हवामान होत आहे. विदर्भ, मराठवाड्यात पावसाची शक्यता असून, आज (ता. ५) पूर्व विदर्भात विजांसह पावसाचा इशारा देण्यात आला आहे. तर मराठवाड्यात तुरळक ठिकाणी विजांसह पावसाची शक्यता हवामान विभागाने वर्तविली आहे.
नैॡत्य अरबी समुद्रात समुद्र सपाटीपासून ३.१ किलोमीटर उंचीवर चक्राकार वाऱ्यांची स्थिती तयार झाली आहे. यातच बंगालच्या उपसागरातील ‘मिगजौम’ चक्रीवादळामुळे पूर्व किनारपट्टी व लगतच्या राज्यांमध्ये जोरदार पावसाला सुरुवात झाली आहे.
या चक्रीवादळाचा प्रभाव महाराष्ट्रातही दिसून येत असून, राज्याच्या अनेक भागात ढगाळ हवामान झाले आहे. विदर्भ, मराठवाड्यात पावसाला पोषक हवामान होत असून, आज (ता. ५) विदर्भातील गोंदिया, गडचिरोली, यवतमाळ जिल्ह्यात विजांसह पावसाचा ‘येलो अलर्ट’ देण्यात आला आहे. तर मराठवाड्यातील नांदेड आणि लातूर जिल्ह्यांत विजांसह पावसाची शक्यता आहे.
ढगाळ हवामानामुळे राज्यात उकाडा वाढला आहे. तर कमाल आणि किमान तापमानातील चढ-उतार सुरूच आहेत. सोमवारी (ता. ४) सकाळपर्यंतच्या २४ तासांमध्ये रत्नागिरी येथे उच्चांकी ३५.६ अंश सेल्सिअस तापमान नोंदले गेले. राज्यात बुहतांश ठिकाणी कमाल तापमान ३० ते ३४ अंशांच्या दरम्यान आहे. किमान तापमानातील वाढ कायम असून, थंडी गायब झाली आहे. महाबळेश्वर येथे राज्यातील नीचांकी १५.९ अंश सेल्सिअस किमान तापमानाची नोंद झाली.
सोमवारी (ता. ४) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) : पुणे ३१.३ (१७.१), जळगाव ३०.८(१७.७), कोल्हापूर ३०.६ (२०.२), महाबळेश्वर २६.१ (१५.९), नाशिक ३०.४ (१८.९), निफाड २९.८ (१७.५), सांगली ३०.७ (१९.८), सातारा ३१.६ (१८.२), सोलापूर ३३.३(१९.९), सांताक्रूझ ३४.६ (२३.५), डहाणू ३२.९ (२३.४), रत्नागिरी ३५.६ (२३.४),
छत्रपती संभाजीनगर २९.८ (१७.५), नांदेड ३१.४ (१९.४), परभणी ३१.१ (१८.६), अकोला ३०.९ (१९.२), अमरावती ३०.६ (१८.७), बुलडाणा २८.० (१७.५), ब्रह्मपुरी ३४.० (१९.०), चंद्रपूर ३१.०(१८), गडचिरोली ३२.६ (१७.६), गोंदिया ३०.२ (१७.०), नागपूर ३०.२(१९), वर्धा ३०.०(१९.२), वाशीम ३१.८(१७.२), यवतमाळ ३१.० (१७.५).
विजांसह पावसाचा इशारा (येलो अलर्ट) :
गोंदिया, गडचिरोली, यवतमाळ.
विजांसह पावसाची शक्यता :
नांदेड, लातूर.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.