Maharashtra Weather Update : कोकण, घाटमाथा, विदर्भात जोरदार सरींची शक्यता

Weather News : पुणे : राज्यात पाऊस ओसरल्यानंतर ढगाळ हवामानासह ऊन-सावल्यांचा खेळ सुरू आहे. तसेच उकाड्यातही वाढ झाली आहे. आज (ता. ८) कोकण, घाटमाथा आणि विदर्भात तुरळक ठिकाणी जोरदार सरींचा इशारा आहे. तर विदर्भात तुरळक ठिकाणी विजांसह हलक्या पावसाची शक्यता आहे. उर्वरित राज्यात पावसाची उघडीप राहण्याचा अंदाज हवामान विभागाने दिला आहे.
झारखंड आणि उत्तर ओडिशामध्ये समुद्र सपाटीपासून ५.८ किलोमीटर उंचीवर चक्राकार वाऱ्यांची स्थिती असून, या भागात आज कमी दाबाचे क्षेत्र तयार होण्याची शक्यता आहे. मॉन्सूनचा आस राजस्थानच्या गंगानगरपासून पिलानी, आग्रा, चुर्क, रांची, दिधा ते पूर्व-मध्य बंगालच्या उपसागरापर्यंत सक्रिय आहे. दक्षिण गुजरातपासून ते उत्तर कर्नाटकपर्यंत किनाऱ्याला समांतर कमी दाबाचा पट्टा कायम आहे.

बुधवारी (ता. ७) सकाळपर्यंतच्या २४ तासांमध्ये कोकण, घाटमाथ्यावर पाऊस ओसरला होता. उर्वरित राज्यात पावसाने उघडीप दिल्याने ऊन-सावल्यांचा खेळ सुरू आहे. घाटमाथ्यावरील कोयना येथे उच्चांकी ९० मिलिमीटर, दावडी येथे ८० मिलिमीटर पावसाची नोंद झाली. राज्यात अनेक ठिकाणी हलक्या ते मध्यम सरींनी हजेरी लावल्याचे हवामान विभागातर्फे सांगण्यात आले.  

आज (ता. ८) कोकणातील रायगड, रत्नागिरी, पुणे आणि सातारा जिल्ह्याचा घाटमाथा, भंडारा, गोंदिया, चंद्रपूर येथे तुरळक ठिकाणी जोरदार सरींचा ‘येलो अलर्ट’ आहे. तर विदर्भात तुरळक ठिकाणी विजांसह पावसाचा इशारा (येलो अलर्ट) आहे. उर्वरित राज्यात मुख्यतः उघडिपीसह हलक्या सरींची शक्यता वर्तविण्यात आली आहे.

जोरदार पावसाचा इशारा (येलो अलर्ट) :
रायगड, रत्नागिरी, पुणे, सातारा, भंडारा, गोंदिया, चंद्रपूर.

विजांसह पावसाचा इशारा (येलो अलर्ट)
अमरावती, नागपूर.