Agriculture Mechanization : पाच महिने उलटले तरीही मिळेना अनुदान

Chhatrapati Sambhajinagar News : कृषी यांत्रिकीकरण अभियान योजनेमधून अवजारे बँकेसाठी दाखल प्रकल्पाचे अनुदान पाच महिन्यांपासून मिळालेले नाही. या संदर्भात शेतकऱ्याने कृषिमंत्र्यांना पत्र पाठविले आहे. जिल्हा अधीक्षक कृषी अधिकाऱ्यांनाही त्याची प्रत दिली आहे.

या संदर्भात देवगाव (ता. पैठण) येथील शेतकरी अशोक अण्णासाहेब ढाकणे यांनी कृषिमंत्र्यांना पाठविलेल्या पत्रानुसार, त्यांचा आत्मा अंतर्गत शेतकरी गट आहे. १२ जानेवारी २०२३ रोजी या गटाद्वारे तालुका कृषी अधिकारी पैठण यांच्याकडे अवजारे बँकेसाठी अर्ज दाखल केला.

तालुका कृषी अधिकाऱ्यांच्या आदेशानुसार ट्रॅक्टर आणि सर्व अवजारे खरेदी केली. सर्व कागदपत्रांची पूर्तता करून तालुका कृषी अधिकारी पैठण कार्यालयाकडे ती कागदपत्रे दाखल केली. १४ जानेवारी रोजी कृषी अवजारे बँकेची स्थापना या बाबीसाठी कृषी विभागाकडे ऑनलाइन अर्ज केला.

अवजारे बँकेसाठी अनुदानाची फाइल छत्रपती संभाजीनगर येथील जिल्हा अधीक्षक कृषी अधिकारी कार्यालयात जवळपास पाच महिन्यांपासून पडून आहे. परंतु अजूनही कृषी अनुदानाचा लाभ मिळाला नसल्याचे शेतकरी अशोक ढाकणे यांचे म्हणणे आहे.

कृषिमंत्र्यांनी याप्रकरणी लक्ष घालून न्याय देण्याची मागणी त्यांनी केली आहे. पाच महिन्यांपासून आपण पैठण कृषी कार्यालय आणि जिल्हा अधीक्षक कृषी अधिकारी कार्यालयाकडे खेटे मारत असल्याचेही शेतकरी ढाकणे यांनी सांगितले.

...तर काय उपयोग? ’

सामान्य बाबीसाठी शेतकऱ्याला कृषिमंत्र्याकडे निवेदन द्यावे लागत असेल तर काय उपयोग, असा सवाल करत आम्ही शेतकरी करंटे म्हणून जन्माला येऊ आणि तसेच मरू, असा खेदही ढाकणे यांनी व्यक्त केला आहे.