Jalyukta Shivar Scheme : अमरावती जिल्ह्यातील २२८ गावांत जलयुक्त शिवार योजना राबविणार

Jalyukta Shivar In Amravati : अमरावती जिल्ह्यात जलयुक्त शिवार योजनेसाठी २२८ गावांची निवड करण्यात आली आहे. खारपाणपट्ट्यातील भातकुली व दर्यापूर तालुक्यात प्रत्येकी फक्त बारा गावांत ही योजना राबविण्यात येणार असून, उर्वरित तालुक्यातील १७ गावांची निवड झाली आहे.

त्यासाठी गावनिहाय आराखडे तयार करण्यात येत असून, मे व जूनमध्ये शक्य न झाल्यास डिसेंबरमध्ये योजनेचा प्रारंभ होण्याची शक्यता आहे.

२०१९ मध्ये सत्तांतर झाल्यावर महाविकास आघाडी सरकारने जलयुक्त शिवार योजना बंद केली होती. पुन्हा सत्तांतरानंतर विद्यमान शिंदे-फडणवीस सरकारने ही योजना कार्यान्वित केली आहे.

यावेळी योजनेच्या कार्यान्वयन समितीमध्ये बदल करण्यात आला असून, जिल्हाधिकाऱ्यांच्या अध्यक्षतेतील समितीत जिल्हा जलसंधारण अधिकारी या समितीचे सदस्य सचिव असून भूजल सर्वेक्षण विभाग व कृषी विभाग सदस्य आहेत.

जिल्हा परिषदेचे मुख्य कार्यकारी अधिकारी या समितीचे सहअध्यक्ष आहेत.जिल्ह्यातील २२८ गावांमध्ये भातकुली व दर्यापूर या खारपाणपट्ट्यातील दोन तालुक्यांतील प्रत्येकी १२ व अमरावती, अचलपूर, धारणी, चिखलदरा, नांदगाव खंडेश्‍वर, धामणगावरेल्वे, चांदूर रेल्वे, मोर्शी, वरूड, चांदूर बाजार, अंजनगाव सुर्जी व तिवसा या तालुक्यांतील प्रत्येकी १७ गावांची निवड करण्यात आली आहेअसे जिल्हा जलसंधारण अधिकारी दिलीप निपाणे यांनी सांगितले.

चार वर्षांत झालेली कामे

वर्ष - निवडलेली गावे - पूर्ण झालेली कामे - खर्च (कोटी)

२०१५-१६ - २५३ - ५६०० - १३०.१९

२०१६-१७- २५३ - ४७२६ - १५०.०६

२०१७-१८- २५२- ४१२४- ६२.६२

२०१८-१९ - २९४- ३२१०- ५२.९४

एकूण- १०५२- १७,६६० - ३९५.८१