Fruit Crop Insurance : रावेरात फळ पीकविमा परताव्यापासून शेतकरी वंचित

जळगाव : रावेर तालुक्यातील सुमारे आठशे केळी उत्पादकांचे (Banana Farmer) केळी पीक विमा योजनेतील (Banana Crop Insurance) परतावे किंवा रक्कम विविध कारणांनी विमा कंपनीकडे (Crop Insurance Company) अडकून पडले आहेत. परतावे दिवाळीपूर्वी न मिळाल्यास आंदोलन करण्याचा पवित्रा शेतकऱ्यांनी दिला आहे. तसेच याबाबत तालुका प्रशासनास निवेदनही देण्यात आले.

राष्ट्रवादी काँग्रेसच्या ओबीसी सेलतर्फे केळीपीक विमा योजनेत मंजूर रक्कम खात्यात न आलेल्या शेतकऱ्यांची बैठक रावेरात नुकतीच झाली. शेतकऱ्यांनी निधी का मिळत नाही, असा प्रश्न उपस्थित केला. तसेच तहसील कार्यालयात सर्व शेतकऱ्यांनी जाऊन नायब तहसीलदार संजय तायडे यांना निवेदन दिले.

अन्य केळी उत्पादक शेतकऱ्यांना केळी पीकविम्याची भरपाई रक्कम मिळून २५ दिवस उलटले तरी देखील या ८०० शेतकऱ्यांना अनेक हेलपाटे मारूनही अजूनही भरपाईची रक्कम त्यांच्या खात्यावर वर्ग झाली नसल्याचेही श्री. कोंडे यांनी निदर्शनास आणून दिले. थकबाकी रक्कम शेतकऱ्यांच्या खात्यात दिवाळीपूर्वी वर्ग न झाल्यास ऐन दिवाळीत राष्ट्रवादी काँग्रेसतर्फे तीव्र आंदोलन करण्यात येईल, असे सांगण्यात आले.

या वेळी रमेश पाटील, दीपक पाटील, योगेश पाटील, सुनील कोंडे, शेख मेहमूद, सचिन पाटील, शेतकरी धीरज भंगाळे, गोपाळ भिरुड, रामभाऊ सोनवणे, रामदास भंगाळे आदी उपस्थित होते.