Animal Husbandry Scheme : ‘पशुसंवर्धन’च्या योजनेसाठी अर्ज करण्याचे आवाहन

नंदुरबार : पशुसंवर्धन विभागामार्फत (Animal Husbandry Department) २०२२-२३ या वर्षासाठी राज्यस्तरीय नावीन्यपूर्ण योजना व जिल्हास्तरीय योजनेअंतर्गत (Animal Husbandry Scheme) वैयक्तिक लाभाच्या योजनेसाठी पात्र पशुपालक, शेतकरी, सुशिक्षित बेरोजगार युवक, युवती व महिलांनी ऑनलाइन पद्धतीने ११ जानेवारीपर्यंत अर्ज सादर करावेत, असे आवाहन जिल्हा पशुसंवर्धन उपआयुक्त डॉ. उमेश पाटील यांनी एका प्रसिद्धी पत्रकाद्वारे केले आहे.

नावीन्यपूर्ण राज्यस्तरीय व जिल्हास्तरीय योजनेअंतर्गत दुधाळ गायी, म्हशीचे गट वाटप करणे, शेळी, मेंढी गट वाटप करणे, १ हजार कुक्कुट मांसल पक्ष्यांच्या संगोपनासाठी निवारा शेड उभारणीसाठी अर्थसाहाय्य देणे, १०० कुक्कुट पिलांचे वाटप करणे तसेच २५+३ तलंगा गट वाटपासाठी लाभार्थ्यांची निवड ऑनलाइन पद्धतीने करण्यात येईल.

जिल्हास्तरीय योजनांसाठी संगणक प्रणाली लागू करण्यात आली असून लाभार्थ्यांने एखाद्या योजनेकरिता अर्ज केल्यानंतर त्यास दरवर्षी पुन्हा अर्ज करावे लागू नये यासाठी तयार केलेली प्रतीक्षा यादी २०२१-२२ पासून पुढील ५ वर्षांपर्यंत लागू राहील. पशुपालकांना डेअरी, पोल्ट्री किंवा शेळीपालनापैकी ज्या योजनेसाठी अर्ज करावयाचा आहे ती निवड करण्याची सुविधा, अर्ज व योजनांची संपूर्ण माहिती https://ah.mahabms.com संकेतस्थळावर तसेच अँड्रॉइड मोबाइलवर AH-MAHABMS गुगल प्ले-स्टोअरवर ११ जानेवारी २०२३ या कालावधीत उपलब्ध करून देण्यात आली आहे.

या योजनेसाठी अर्ज फक्त ऑनलाइन पद्धतीने स्वीकारण्यात येतील. अर्ज भरताना अर्जदाराने नोंदविलेल्या मोबाइल क्रमांकावर अर्जाच्या स्थितीबाबत संदेश पाठविण्यात येणार असल्याने कुठल्याही परिस्थितीत अर्जदाराने आपला मोबाइल क्रमांकात बदल करू नये.

योजनेबाबत अधिक माहितीसाठी टोल फ्री क्रमांक १९६२ किंवा १८००-२३३-०४१८ किंवा तालुक्याचे पशुधन विकास अधिकारी (विस्तार ), पंचायत समिती, जिल्हा पशुसंवर्धन अधिकारी अथवा जिल्हा पशुसंवर्धन उपायुक्त कार्यालय, तालुका लघु पशुवैद्यकीय सर्व चिकित्सालय अथवा नजीकच्या पशुवैद्यकीय केंद्रावर संपर्क साधावा, असे आवाहन डॉ. पाटील यांनी केले आहे.