श्रीगोंद्यात व्यापाऱ्यांनी पाडले लिंबाचे दर

श्रीगोंदे, जि. नगर : कायम उत्पन्न देणाऱ्या लिंबाचे दर श्रीगोंदा तालुक्यात व्यापाऱ्यांनी पाडल्याने शेतकरी चांगलेच अडचणीत आले आहेत. मागील आठवड्यात १७ ते २० रुपये किलो दराने विकले जाणारे लिंबू अचानक ५ ते ७ रुपये किलोवर आणले आहेत. बाजार समित्या बंद असल्यामुळे मागणी नसल्याचे कारण देत व्यापाऱ्यांनी साखळी करुन दर पाडल्याचा आरोप शेतकऱ्यांनी केला आहे. विशेषतः गावागावांत वजन काटे घेऊन बसणाऱ्या आणि शेतकऱ्याची लुट करणाऱ्या व्यापाऱ्यांवर बाजार समितीसह कोणाचेही बंधन नसल्याचे दिसून येत आहे.  उसाचे आगार समजल्या जाणाऱ्या श्रीगोंदा तालुक्यात सात हजार हेक्टरवर लिंबू बाग आहे. मात्र तालुक्यातील शेतकऱ्यांना लिंबासाठी हक्काची बाजारपेठ नसल्याने त्यांची लूट होत असल्याचे पुन्हा एकदा समोर आले आहे. श्रीगोंद्यातून सध्या सुमारे १०० टन लिंबू रोज बाहेर जाते. प्रामुख्याने मुंबई व पुणे भागात तर पंजाब, राजस्थान, दिल्ली या राज्यात काही प्रमाणात लिंबू जातो. चार दिवसांपूर्वी गावातील छोटे व्यापारी १७ ते १८ रुपये किलो दराने लिंबू खरेदी करीत होते. मात्र अचानक हेच लिंबू दोनच दिवसात ५ ते ७ रुपयांवर आणले. त्यासोबतच प्रत्येक शेतकऱ्यांच्या लिंबात वजनात २ किलोपर्यंत हक्काची कपात केली जाते. त्याचे ठोस कारण कुणालाही देता येत नाही. मागणी नाही, उठाव नाही, असे सांगून शेतकऱ्यांची अडचण वाढविण्याचे काम श्रीगोंद्यात होत आहे. वाडी, गाव येथे किरकोळ स्वरूपात लिंबू खरेदी करणारे व्यापारी हे लिंबू श्रीगोंदे बाजार समितीत विकतात. तेथून ते मुंबईसह परराज्यात जातात. लिंबू पिकाची स्थिती 

जास्त दराने विक्री मुंबईतील एका व्यापाऱ्याने नाव न छापण्याच्या अटीवर माहिती देताना सांगितले की, श्रीगोंद्यात ५ ते ७ रुपयांनी खरेदी होणारे लिंबू आम्ही २० ते २२ रुपयांनी घेतो. किरकोळ बाजारात तर २० रुपयाला ४ लिंबू देतात, अशी भीषण अवस्था आहे. एका किलोत ३० लिंबू बसतात. प्रतिक्रिया कुठलाही व्यापारी शेतकऱ्यांवर मनमानी करीत असला तर त्यावर थेट कारवाई करु. या व्यापाऱ्यांवर निर्बंध नसले म्हणजे मनमानी करु शकतात, असे नाही. अधिक माहिती घेऊन गरज पडली तर पुढे होऊन कारवाई करु. - महेंद्र माळी, तहसीलदार, श्रीगोंदे.