सोयाबीन बियाण्यांची खरिपासाठी जुळवाजुळव

अकोला : येत्या हंगामासाठी शेतकरी घरगुती सोयाबीन बियाण्याची शोधाशोध करू लागले आहेत. सध्या ज्यांच्याकडे सोयाबीन उपलब्ध आहे, असे शेतकरी, शेतकरी गटांकडून ८० ते १०० रुपयांदरम्यान प्रति किलो दराने विक्री केली जात आहे.

या हंगामात सोयाबीन बियाण्याच्या उपलब्धतेबाबत आतापासूनच विविध प्रश्‍न उपस्थित केले जाऊ लागलेले आहेत. प्रामुख्याने गेल्यावेळी काढणीच्या काळात पाऊस झाल्याने सोयाबीनचा दर्जा काही भागात मोठ्या प्रमाणात खालावला होता. अशा स्थितीत बहुतांश शेतकऱ्यांनी सोयाबीन विक्री केली. चांगल्या दर्जाच्या सोयाबीनला यंदा दरही हमीभावापेक्षा अधिक मिळालेला आहे. आता हंगामात लागवड करायची तर सोयाबीन बियाणे कसे मिळवायचे हा पेच आहे. काही शेतकऱ्यांजवळ सोयाबीन आहे. त्यांनी विक्री सुरू केली असून, साधारणपणे ८ ते १० हजार रुपयांदरम्यान प्रतिक्विंटल दर आकारत आहेत. 

बाजारपेठांमध्ये सोयाबीन गेल्या काही दिवसांत सात हजारांपर्यंत विक्री झाली होती. ही तेजी अद्यापही कायम आहे. या भागातील बाजार समित्यांमध्ये मध्य प्रदेशातील विविध बियाणे कंपन्यांनी सोयाबीनची खरेदी केलेली आहे. संपूर्ण चांगले सोयाबीन कंपन्यांनी गोळा केले असून, तेच आता प्रक्रिया करून शेतकऱ्यांना या हंगामासाठी विक्री केले जाणार आहे. गेल्या वर्षात सोयाबीन उगवणीबाबत हजारोंच्या संख्येने तक्रारी झाल्या होत्या. हे सर्व लक्षात घेता शेतकरी सजगपणे बियाण्याचा शोध घेत आहे. ठिकठिकाणी बियाण्याची विचारणा सुरू झालेली आहे.

प्रतिक्रिया

सोयाबीन बियाण्याला या वर्षी केंद्र, राज्य सरकारकडून अनुदान द्यायला हवे. जसे हरभरा बियाण्यासाठी भेटले होते. शासनाने अनुदान दिले पाहिजे, अशी शेतकऱ्यांची गावागावात मागणी पुढे येत आहे.  - श्रीकृष्ण शेलकर, शेतकरी, मोताळा, जि. बुलडाणा

प्रतिक्रिया यंदाच्या हंगामात सोयाबीन बियाण्याचा तुटवडा भासणार आहे, हे आतापासून दिसत आहे. काही जणांनी सोयाबीन साठवलेले आहे. परंतु त्याच्या उगवणीबाबतचे प्रश्‍न निर्माण होत आहेत. माझ्याकडे चार लॉट होते. पैकी एक पास झाला.  - विनोद पाटील, शेतकरी, सुडी, जि. वाशीम 

प्रतिक्रिया

बहुतेक शेतकऱ्यांकडील सोयाबीन विकून झालेले आहे. ज्यांच्याकडे आहे ते प्रति किलो १०० रुपयांनीही द्यायला मागेपुढे करीत आहेत. यंदा सोयाबीन बियाण्याचा दर अस्मानाला भिडला आहे. बहुतेक शेतकऱ्यांनी आर्थिक अडचणीमुळे स्वतः जवळचे सोयाबीन विक्री केले. यंदा त्यामुळे सोयाबीन बियाण्याची टंचाई निश्चित जाणवणार आहे. शिवाय खरेदी केलेल्या बियाण्याची उगवण क्षमता सुद्धा महत्त्वाची राहील. ती तपासूनच शेतकऱ्यांना मिळायला हवी. सरकारने आत्तापासूनच नियोजन करून पेरणीपूर्वी शेतकऱ्यांना गावागावांत शुद्ध बियाणे पुरविण्यासाठी युद्धपातळीवर हालचाली केल्या पाहिजेत. पेरणीनंतर बियाणे मिळाले तर ते वराती मागून घोडे दामटण्याचा प्रकार होईल.  -डी. एन. पांचाळ,  शेतकरी, गोरेगाव, जि. बुलडाणा