वाळूमाफियांची तोंडलेत मारहाण

बोंडले, जि. सोलापूर : तोंडले (ता. माळशिरस) येथील शिवारातील उजनी कालव्याच्या पुलाखालील घुमेरा ओढ्यात बेकायदेशीररीत्या वाळू उपसा करणाऱ्या वाळूमाफियांवर कारवाईसाठी आलेल्या माळशिरसच्या तहसील कार्यालयाच्या कर्मचाऱ्यांना वाळूमाफियांकडून शिवीगाळ करून मारहाण करण्यात आली.

सोमवारी (ता. १९) तोंडले शिवारातील उजनी कालव्याच्या पुलाखालील घुमेरा ओढ्यात होत असलेल्या बेकायदेशीररीत्या वाळू उपसासंदर्भात मिळालेल्या माहितीनुसार माळशिरस तहसीलदार अभिजित पाटील यांनी कोतवाल जावेद युन्नूस मणेरी यांना पुढे जाऊन तोंडले येथील तलाठी पांडुरंग धनवडे यांना घेऊन त्या ठिकाणी येण्यास सांगितले. त्याप्रमाणे मणेरी दुचाकीवरून धनवडे यांना घेऊन उजनी कालव्याच्या पुलावर आले. तेव्हा कालव्याच्या बाजूच्या रस्त्याने लाल रंगाचा महिंद्रा कंपनीचा ट्रॅक्‍टर (विना क्रमांक) पाठीमागे दीड ब्रास वाळूने भरलेली चारचाकी ट्रॉली घेऊन जगन्नाथ भारत पवार (रा. तोंडले) हा चालवीत येत असलेला दिसला. लगेच या दोघांनी तो ट्रॅक्‍टर कालव्याच्या पुलाजवळ थांबविला व ट्रॅक्‍टरची चावी काढून घेतली.

तुम्ही आमचा ट्रॅक्‍टर का थांबविला म्हणून ट्रॅक्‍टरचालक जगन्नाथ भारत पवार व त्याचा भाऊ कृष्णा भारत पवार यांनी शिवीगाळ करून दमदाटी चालू केली. त्या वेळी त्या ठिकाणी तहसीलदार पाटील, नायब तहसीलदार तुषार देशमुख, चालक आनंद गायकवाड यांचे वाहन येत असल्याचे पाहून त्या दोघांनी कोतवाल मणेरी यांना मारहाण करत वाळूने भरलेला ट्रॅक्‍टरसह तेथून ते तांदूळवाडी रस्त्याने पळून जाऊ लागले. यानंतर कोतवाल मणेरी व तलाठी धनवडे हे दुचाकीवरून, तर तहसीलदार पाटील, नायब तहसीलदार देशमुख, चालक गायकवाड हेही त्यांच्या वाहनातून त्यांचा पाठलाग करू लागले. परंतु रात्री झालेल्या पावसामुळे रस्त्यावरील चिखलात त्याचे वाहन फसले व मात्र चिखलातून वाळूचा ट्रॅक्‍टर निघून गेला.

याबाबत जगन्नाथ भारत पवार व कृष्णा भारत पवार यांच्याविरोधात वेळापूर पोलिस ठाण्यात फिर्याद दाखल करण्यात आली आहे.