राजारामबापूंनी लोककल्याणासाठी घेतले टोकाचे कष्ट : शरद पवार

इस्लामपूर, जि. सांगली : ‘‘लोकनेते राजारामबापू पाटील यांनी लोकांच्या भल्यासाठी टोकाचे कष्ट घेतले. खूजगाव धरणावरून बापू-दादांचा टोकाचा संघर्ष झाला. मात्र यातून जिल्ह्याचे नुकसान होत असल्याचे लक्षात आल्यावर दोघांनी एकत्र बसून हा वाद मिटविला. खूजगाव येथे धरण झाले असते, तर जिल्ह्याचा दुष्काळ कायमचा संपला असता,’’ असे मत राष्ट्रवादी काँग्रेसचे अध्यक्ष शरद पवार यांनी राजारामनगर येथील सभेत व्यक्त केले. 

लोकनेते राजारामबापू पाटील यांच्या जन्मशताब्दी वर्षाच्या प्रारंभानिमित्त आयोजित समारंभात पवार बोलत होते. काँग्रेस पक्षाचे ज्येष्ठ नेते सुशीलकुमार शिंदे, राष्ट्रीय युवा नेता कन्हैयाकुमार, माजी केंद्रीय राज्यमंत्री बबनराव ढाकणे, राष्ट्रवादी काँग्रेसचे प्रदेशाध्यक्ष जयंतराव पाटील, आमदार जितेंद्र आव्हाड, ज्येष्ठ पत्रकार मधुकर भावे, माजी आमदार लक्ष्मण माने उपस्थित होते. याप्रसंगी सरोजिनी चव्हाण यांनी लिहिलेल्या ‘राजयोगी’, व ‘विधी मंडळातील बापू’ या पुस्तकांचे प्रकाशन करण्यात आले. 

पवार म्हणाले,‘‘ बापू उद्योगमंत्री होते. त्यांनी राज्यात औद्योगिक वसाहत उभी करून स्थानिक मुलांना रोजगार उपलब्ध करून दिला. त्यांच्याकडे विधायक दृष्टी होती.`` 

शिंदे म्हणाले, ‘‘बापूंनी इंदिरा गांधींचा २० कलमी कार्यक्रम गोर-गरिबांच्या घरापर्यंत नेला. त्यांनी गोर-गरिबांची सेवा करण्याची नाळ कधी तुटू दिली नाही.’’

कन्हैयाकुमार म्हणाले, ‘‘भाजपला हरविण्यासाठी बापूंचा आदर्श घेऊन जनसंघर्ष उभा करायला हवा. भाजपला घालवायला इंग्रजांपेक्षा जादा कष्ट घ्यायला हवेत.’’

पाटील म्हणाले,‘‘तालुक्याच्या सर्वांगीण प्रगतीच्या मुळाशी बापूंचा विचार आहे. भविष्यात नव्या पिढीस प्राधान्य देऊ.’’ शाहीर आझाद नायकवडी यांनी बापू, अण्णाभाऊ साठे यांच्या जीवनावरील पोवाडा सादर केला. 

जयंतराव हे उद्याचे महाराष्ट्र चालविणारे नेतृत्व

‘‘उद्याचा महाराष्ट्र चालविणारे नेतृत्व म्हणून आम्ही जयंतरावांकडे पाहतो. आमचे काही लोक पक्ष सोडून चालले आहेत. ते म्हणतात कामे होत नाहीत. मात्र कामे कशी करून घ्यायची हे त्यांनी जयंतरावांकडून शिकावे,’’ असा टोला शरद पवार यांनी पक्षांतर केलेल्या नेत्यांना मारला.