औरंगाबाद, जालना, बीड जिल्ह्यांत कापसाच्या बहुतांश वेचण्या उरकल्या

बीड : मराठवाड्यातील तीनही जिल्ह्यांत सरासरीच्या ८५ टक्‍के कपाशीची लागवड झाली. या पिकाच्या बहुतांश वेचण्या उरकल्या आहेत. तर, तुरीवर काही ठिकाणी शेंगा पोखरणाऱ्या अळीचा प्रादूर्भाव दिसून आला आहे.

औरंगाबाद, जालना व बीड या तीन जिल्ह्यांत कपाशीचे सरासरी क्षेत्र १० लाख ४१ हजार ९७१ हेक्‍टर होते. प्रत्यक्षात ८ लाख ८८ हजार ९३५ हेक्‍टरवर कपाशीची लागवड झाली. त्यापैकी औरंगाबाद जिल्ह्यातील ३ लाख ६१ हजार ८२५ हेक्‍टरवरील कपाशीच्या पिकामध्ये अनेक ठिकाणी गुलाबी बोंड अळीचा प्रादूर्भाव आढळून आला आहे. बहुतांश ठिकाणी कपाशीच्या २ वेचण्या पूर्ण झाल्या आहेत. जालना जिल्ह्यात कपाशीच्या सरासरी २ लाख ९० हजार १५१ हेक्‍टर क्षेत्राच्या तुलनेत २ लाख ६२ हजार ९४१ हेक्‍टरवर कपाशीची लागवड झाली. अतिवृष्टीने मोठ्या प्रमाणात नुकसान कपाशीचे नुकसान झाले. वाचलेल्या पिकात सद्यःस्थितीत वेचणीचे काम सुरू आहे. 

बीड जिल्ह्यात कपाशीच्या सरासरी ३ लाख ५७ हजार ५५२ हेक्‍टर क्षेत्राच्या तुलनेत २ लाख ६४ हजार १६९ हेक्‍टरवर कपाशीची लागवड झाली. जिल्ह्यातील हलक्‍या जमिनीवरील कपाशीची वेचणी संपली आहे. मध्यम ते भारी जमिनीवरील कपाशीच्या वेचणीचे काम सुरू आहे. 

औरंगाबाद, जालना व बीड या तीन जिल्ह्यात तुरीचे सरासरी क्षेत्र १ लाख २७ हजार हेक्‍टर आहे. त्या तुलनेत प्रत्यक्षात १ लाख ८४ हजार २३१ हेक्‍टरवर तुरीची पेरणी झाली. सरासरी क्षेत्राच्या पुढे जाऊन शेतकऱ्यांनी तुरीला पसंती दिली. तरीही औरंगाबाद जिल्ह्यात उशिरा पेरणी झालेल्या ठिकाणी पावसाच्या खंडामुळे पीक विरळ झाले. अति पावसामुळे तुरीवर मर रोगाचा प्रादूर्भाव झाला. सद्यःस्थितीत संकटातून वाचलेले तुरीचे पीक बहुतांश ठिकाणी दाणे भरण्याच्या अवस्थेत आहे.

जालना जिल्ह्यात वेळेत पेरणी झालेले तुरीचे पीक दाणे परिपक्‍व होण्याच्या, तर उशिरा पेरणी झालेले तुरीचे पीक फुले व शेंगा लागण्याच्या अवस्थेत आहे. बीड जिल्ह्यातील तुरीच्या पिकावर ढगाळ वातावरणामुळे काही ठिकाणी शेंगा पोखरणाऱ्या अळ्यांचा प्रादूर्भाव आढळून आला. तर बहुतांश भागातील पीक शेंगा पक्‍वतेच्या अवस्थेत आहे.