औरंगाबाद जिल्ह्यात मका खरेदीसाठी आठ केंद्रांना मंजुरी

औरंगाबाद : हमी दराने मक्याची खरेदी करण्यासाठी जिल्ह्यात आठ केंद्रांना मंजुरी देण्यात आली. तूर, हरभऱ्यानंतर आता मक्याची खरेदी केंद्रांत होईल, अशी माहिती मार्केटिंग फेडरेशनच्या जिल्हा कार्यालयातर्फे देण्यात आली. 

मार्केटिंग फेडरेशनच्या जिल्हा कार्यालयाकडून जिल्हा प्रशासनाकडे जिल्ह्यात मक्याची खरेदी करण्यासाठी आठ केंद्रे सुरू करण्याचा प्रस्ताव देण्यात आला होता. त्यामध्ये करमाड, कन्नड, गंगापूर, सिल्लोड, सोयगाव, खुलताबाद, वैजापूर, फुलंब्री या केंद्रांचा समावेश होता. जिल्हाधिकाऱ्यांनी या प्रस्तावाला मान्यता दिली. सोमवारी (ता. १८) या सर्व केंद्रांवर मका खरेदीची नोंदणी सुरू करण्यात आली आहे. त्यासाठीचे ॲप सोमवारी सकाळीच सर्व केंद्रांना पाठविण्यात आले. 

जिल्ह्यात रब्बीत मका मोठ्या प्रमाणात घेतली जाते. सद्यस्थितीत मक्याची हमी दरापेक्षा कमी दराने खरेदी होते आहे. त्यामुळे शेतकऱ्यांचे नुकसान होत आहे. परंतु, आता मका खरेदी केंद्रांना प्रशासनाने मंजुरी दिली. त्यामुळे हमी दर मिळण्याची शेतकऱ्यांना आशा आहे. 

दरम्यान, जिल्ह्यातील ९१२ शेतकऱ्यांकडून नाफेडद्वारे सहा केंद्रांवरून ५१०४ क्विंटल तूरीची हमी दराने खरेदी करण्यात आली. दुसरीकडे जिल्ह्यात आतापर्यंत ७९१ शेतकऱ्यांनी हरभऱ्याची खरेदी करण्यासाठी विविध केंद्रांकडे नोंदणी केली. त्यांपैकी ३६४ शेतकऱ्यांकडून ३९४४ क्विंटल हरभऱ्याची खरेदी करण्यात आली, अशी माहिती मार्केटिंग फेडरेशनच्या जिल्हा मार्केटिंग अधिकारी कार्यालयातर्फे देण्यात आली.