मृद व जलसंधारण आयुक्तालयाच्या बळकटीकरणासाठी प्राधान्याने निर्णय : मंत्री शंकरराव गडाख

औरंगाबाद : मृद व जलसंधारण आयुक्त कार्यालयाच्या माध्यमातून भरीव काम होणे गरजेचे आहे. त्यादृष्टीने येथे पुरेशा प्रमाणात मनुष्यबळ इतर अनुषंगिक बाबी उपलब्ध करुन देण्यासाठी अद्ययावत प्रस्ताव सादर करावा.आयुक्तालयाच्या बळकटीकरणासाठी प्राधान्याने निर्णय घेण्यात येतील, असे आश्वासन जलसंधारण मंत्री शंकरराव गडाख यांनी दिले.

जल व भूमी व्यवस्थापनाच्या क्षेत्रात वाल्मी या संस्थेचे योगदान उल्लेखनीय राहिले आहे. त्यापार्श्वभुमीवर या संस्थेला गतवैभव प्राप्त करुन देण्याच्या दृष्टीने सर्वांनी सक्रिय काम करण्याचे निर्देशही श्री.गडाख यांनी दिले.

येथील वाल्मी मृद व जलसंधारण आयुक्त कार्यालय येथे सोमवारी (ता. ३१) आयोजित मृद व जलसंधारण कार्यालय आणि वाल्मी संस्थेच्या आढावा बैठकीत श्री.गडाख बोलत होते. यावेळी मृद व जलसंधारण (मरा)औरंगाबादचे आयुक्त मधुकर आर्दड, अपर आयुक्त विश्वनाथ नाथ, उपायुक्त (प्रशासन) रवींद्र गोटे, अभियांत्रिक शाखा विभागप्रमुख प्रा.डॉ.अविनाश गारुडकर,विज्ञान विद्याशाखा प्रमुख प्रा.डॉ.अजय इंगळे, प्रा.डॉ. दिलीप दुरबुडे, सहाय्यक आयुक्त ( मृद व जलसंधारण) सुहास वाघ, प्रशासकीय अधिकारी अशोक गायकवाड, प्रादेशिक जलसंधारण अधिकारी वसंत गालफाडे, जलसंधारण अधिकारी अमोल राठोड आदी उपस्थित होते.

श्री.गडाख म्हणाले, की ‘वाल्मी’मध्ये शेतकरी प्रशिक्षण कार्यक्रम ,चर्चासत्रे आणि संशोधन उपक्रमांमध्ये वाढ होणे गरजेचे आहे. येथील पाणी आणि माती प्रयोगशाळेबद्दल शेतक-यांमध्ये विश्वासहर्ता आहे. हे लक्षात घेऊन जास्तीत जास्त संख्येने येथील प्रयोगशाळेतून परिक्षण अहवाल शेतक-यांना उपलब्ध करुन द्यावेत. तसेच, विभागनिहाय येत्या वर्षभराचा प्रशिक्षण आराखडा तयार करुन सादर करावा. शासनस्तरावर त्याच्या अधिक प्रभावी अमंलबजावणीसाठी पाठपुरावा करण्यात येईल. संस्थेच्या विविध मागण्या, रिक्त पदांच्या भरती बाबत शासनस्तरावर प्रयत्न करण्याचे आश्वासन त्यांनी यावेळी दिले. यावेळी प्रा.डॉ.राजेश पुराणिक यांनी वाल्मी संस्थेचे तर अमोल राठोड यांनी आयुक्त कार्यालयाच्या कामकाजाचे सादरणीकरण करुन माहिती दिली.