Flower Demand: लग्नसराई, उत्सवांमुळे फुलांना मागणी कायम

Jalgaon News: व्हॅलेंटाइन-डेच्या पार्श्‍वभूमीवर बाजारात गुलाबाची मागणी चांगली राहिली. आता फुलांची आवक वाढली असून, त्यांना लग्नसराईसह उत्सव, समारंभांसाठी उठाव असल्याने दरही टिकून आहेत. झेंडू, लिली, मोगरा गुलाबाच्या फुलांची मोठी मागणी सध्या आहे.

मागील शुक्रवारी (ता. १४) व्हॅलेंटाइन डे होता. या कालावधीत गुलाबाच्या फुलांना मागणी होती. परंतु ही मागणी अजूनही कायम आहे. कारण लग्नसमारंभ, साखरपुडे, राजकीय, सामाजिक, धार्मिक कार्यक्रम, उत्सवांसाठी फुलांना उठाव आहे. फुलांची आवक जळगाव तालुक्यातील शिरसोली, आसोदा, भुसावळातील विविध गावांतून होत आहे.

जळगाव शहरातील वल्लभदास वालजी व्यापारी संकुलातील फुलबाजारात फुलांची आवक टिकून आहे. झेंडू, गुलाब यांची आवक अधिक आहे. जरबेराचा पुरवठा पुणे, नगर भागांतून अडतदार, खरेदीदार करून घेत आहेत. कारण स्थानिक क्षेत्रात जरबेरा लागवड कमी आहे.

अनेक शेतकऱ्यांनी व्हॅलेंटाइन डेच्या पार्श्‍वभूमीवर गुलाब फुलांची काढणी व अन्य व्यवस्थापन केले होते. त्यांना दर चांगले मिळाले. परंतु या आठवड्यातही फुलांची आवक व मागणी वाढली आहे. आवक वाढली, पण दरही टिकून आहेत. दर्जेदार फुलांची आवक बाजारात होत आहे. कारण सध्या वातावरण नीरभ्र आहे.

दर टिकून असल्याने शेतकऱ्यांच्या हाती पैसाही राहत आहे. काही शेतकरी थेट किरकोळ खरेदीदारांना गुलाबाची पाठवणूक जळगाव, चाळीसगाव व भुसावळ आदी शहरांत करीत आहेत. काही शेतकरी थेट ग्राहकांना आठ ते नऊ रुपये प्रति नग या दरात गुलाब फुलांची विक्री करीत आहेत.

मोगरा फुलांचे दर ५०० ते ६०० रुपये

शेतकऱ्यांकडून सरासरी पाच ते सात रुपये प्रति नग या दरात गुलाब फुलांची खरेदी केली जात आहे. झेंडूचे दरही ३० ते ३५ रुपये प्रति किलो, असे आहेत. मोगरा फुलांचे दर ५०० ते ६०० रुपये प्रति किलोपेक्षा अधिक आहेत. फुलांची पाठवणूक काही अडतदार नागपूर, अमरावती, गुजरातमधील सुरत, अहमदाबाद, बडोदा व राज्यात अन्य भागांत करीत आहेत.