Flower Market: व्हॅलेंटाइन डे’साठी गुलाब आवकेत वाढ

Jalgaon News: व्हॅलेंटाईन डेच्या पार्श्वभूमीवर बाजारात गुलाबाची आवक वाढली आहे. उठाव असल्याने दरही टिकून आहेत. शुक्रवारी (ता.१०) जिल्ह्यातील भुसावळ, जळगाव व अन्य शहरांतील बाजारात गुलाबाच्या फुलांची मोठी मागणी होती.

येत्या शुक्रवारी (ता.१४) व्हॅलेंटाईन डे आहे. त्यासंबंधी फुलांची मागणी बाजारात मागील बुधवारीच (ता.७) सुरू झाली. फुलांची आवक जळगाव तालुक्यातील शिरसोली, आसोदा, भुसावळातील विविध गावांतून होत आहे. जळगाव शहरातील वल्लभदास वालजी व्यापारी संकुलातील फूल बाजारात मागील दोन-तीन दिवस प्रतिदिन सरासरी २५ हजार नग गुलाब फुलांची आवक झाली आहे.

गुलाब फुलांचे दर नोव्हेंबरमध्ये प्रतिनग दोन ते तीन आणि कमाल पाच रुपये, असे होते. डिसेंबरमध्ये दर सरासरी दोन रुपये प्रतिनग असे मिळाले. जानेवारीत लग्नसराईमुळे दर प्रतिनग तीन ते पाच रुपये, असे काही दिवस मिळाले. परंतु या काळात आवकही मर्यादीत किंवा कमी होती.

अनेक शेतकऱ्यांनी व्हॅलेंटाइन डेच्या पार्श्वभूमीवर गुलाब फुलांची काढणी व अन्य व्यवस्थापन केले. यामुळे आवक या आठवड्यातच वाढली आहे. आवक वाढली, पण दरही टिकून आहेत. शेतकऱ्यांकडून सरासरी पाच ते सात रुपये प्रतिनग व सरासरी पाच रुपये प्रतिनग या दरात गुलाब फुलांची खरेदी केली जात आहे.

गुलाब फुलांची पाठवणूक काही अडतदार नागपूर, अमरावती, गुजरातमधील सूरत, अहमदाबाद, बडोदा तसेच राज्यातील अन्य भागांत करीत आहेत. दर्जेदार गुलाब फुलांची आवक बाजारात होत आहे. त्यांचे दर टिकून असल्याने शेतकऱ्यांचा जानेवारीत झालेला तोटा किंवा कमी नफा भरून निघण्यासही मदत होत आहे. काही शेतकरी थेट किरकोळ खरेदीदारांना गुलाबाची पाठवणूक जळगाव, चाळीसगाव व भुसावळ आदी शहरांत करीत असून, त्यात आठ ते नऊ रुपये प्रतिनग असाही दर मिळत आहे.

वल्लभदास वालजी व्यापारी संकुलातील अडतदारांनीदेखील गुलाब फुलांच्या पाकळ्या निर्मिती, हार, गुच्छ निर्मिती सुरू केली आहे. खरेदीदारांकडून आगाऊ नोंदणी होत असून, त्यासंबंधीची कार्यवाही या व्यापारी संकुलात सध्या वेगात सुरू आहे, अशी माहितीही दिली.