Agrowon Podcast : तुरीचे बाजारभाव स्थिर; कापूस, सोयाबीन आणि कांदा तसेच आल्याचे सध्याचे दर काय आहेत?

Market Bulletin :

सोयाबीनमध्ये नरमाई

आंतरराष्ट्रीय बाजारात आज सोयाबीन आणि सोयापेंडच्या भावातील चढ उतार सुरुच आहेत. सोयाबीनच्या आजही नरमाई आली होती. आज दुपारपर्यंत सोयाबीनचे वायदे १०.०७ डाॅलर प्रतिबुशेल्सवर होते. तर सोयापेंडचे वायदे ३२२ डाॅलर प्रतिबुशेल्सवर होते. देशातील बाजारातही मागील दोन दिवसांमध्ये सोयाबीन ५० रुपयांनी कमी झाले होते. प्रक्रिया प्लांट्सनी सोयाबीन खरेदीचे भाव ४ हजार ४५०० ते ४ हजार ७०० रुपयांच्या दरम्यान काढले होते. तर बाजारात सोयाबीनची खरेदी ४ हजार ते ४ हजार ५०० रुपयांच्या दरम्यान सुरु होती. सोयाबीन बाजारात आणखी काही दिवस चढ उतार दिसू शकतात, असा अंदाज सोयाबीन बाजारातील अभ्यासकांनी व्यक्त केला. 

कापूसात चढ उतार

कापसाच्या भावात आज पुन्हा चढ उतार सुरु आहेत. आंतरराष्ट्रीय बाजारात कापसाचे वायदे ७० सेंट प्रतिपाऊंडपेक्षा कमीच राहत आहेत. आज दुपारपर्यंत ६८ सेंट प्रतिपाऊंडच्या दरम्यान कायम होते. तर देशातील नोव्हेंबरचे वायदे काहीसे कमी होऊन ५७ हजार ७०० हजार रुपये प्रतिखंडीवर होते. तर बाजार समित्यांमधील कापूस आवक नगण्य पातळीवर पोचली आहे. तरीही कापसाचे भाव  ६ हजार ९०० रुपये ते ७ हजार ५०० रुपयांच्या दरम्यान होते. कापसाच्या भावातील ही स्थिती आणखी काही दिवस कायम राहू शकते, असा अंदाज बाजारातील अभ्यासकांनी व्यक्त केला. 

गव्हाच्या भावाला आधार

गव्हाला सणांमुळे मागणी वाढली आहे. सणांची मागणी पूर्ण करण्यासाठी व्यापारी गव्हाची खरेदी करत आहेत. पण सध्या बाजारात मागणीच्या तुलनेत गव्हाचा पुरवठा कमी दिसतो. त्यातच सरकारची गहू विक्रीही कमी झाली आहे. यामुळे गव्हाचे भाव गेल्या आठवडाभरात काहीसे वाढलेले दिसत आहेत. गव्हाचा भाव मागील काही दिवसांपासून १०० ते १५० रुपयांनी वाढला आहे. सध्या गव्हाचा प्रतिक्विंटल सरासरी २ हजार ६०० ते ३ हजार ४०० रुपयांच्या दरम्यान आहेत. बाजारातील गव्हाची मागणी आणि पुरवठा लक्षात घेता गव्हाच्या भावातील सुधारणा कायम राहील, असा अंदाज व्यापारी आणि अभ्यासक व्यक्त करत आहेत. 

तुरीचा भाव स्थिरावला

तुरीचा बाजार मागील काही दिवसांपासून स्थिरावला आहे. तुरीला वाढलेल्या भावात उठाव काहीसा कमी झाला होता. तसेच आयातही सुरु आहे. याचा दबाव दरावर आला. पण भाव १० हजारांच्या दरम्यान राहीले होते. मात्र सणांची मागणी वाढल्याने तुरीचे भाव मागील काही दिवसांपासून वाढले आहेत. तुरीचा सरासरी भाव १० हजार ते १० हजार ७०० रुपयांच्या दरम्यान आहे. तुरीच्या भावात पुढच्या काळातही काही प्रमाणात चढ उतार राहू शकतात, असा अंदाज व्यापारी आणि अभ्यासकांनी व्यक्त केला. 

कांदा स्थिरावला

कांद्याचा भाव आजही स्थिरावलेला दिसला. नाफेडने बाजारात कांद्याची विक्री सुरु केल्यानंतर कांद्याच्या भावात नरमाई आली होती. मात्र मागील ५ दिवसांपासून कांद्याचा भाव स्थिरावला आहे. आजही कांदा मार्केट ३ हजार ५०० ते ३ हजार ९०० रुपयांच्या दरम्यान होते. नाफेडने बाजारात कांदा विक्री सुरु केली तरी बाजारावर फार मोठ्या प्रमाणावर परिणाम होण्याची शक्यता कमीच आहे. कांदा भावात पुढच्या काळात सुधारणा अपेक्षित आहे, असा अंदाज कांदा बाजारातील अभ्यासकांनी व्यक्त केला