Alphonso Mango Prices: हापूसच्या पेटीचा दर ६ ते ७ हजारांवर स्थिर

Sindhudurg News: वाढलेले तापमान, धुके आणि ढगाळ वातावरण यामुळे या वर्षी हापूस आंबा उत्पादन २५ टक्केच मिळण्याचा अंदाज आहे. त्यामुळे हापूस पेटीचा दर ६ ते ७ हजारांवर स्थिरावला आहे. सध्या स्थानिक बाजारपेठेत परिपक्व आंब्याला प्रति डझन १८०० ते २००० रुपये दर मिळत आहे. हेच दर यापुढे देखील कायम राहण्याची शक्यता आहे.

या वर्षीच्या हापूस हंगामाला काहीशी गती प्राप्त झाली आहे. आंब्याची आवक वाढली आहे. परंतु आंबा उत्पादन खूपच कमी येण्याचा अंदाज आहे. पहिल्या टप्प्यातील आंबा मोहराला अपेक्षित फळधारणा झाली नाही. त्यानंतर दुसऱ्या आणि तिसऱ्या टप्प्यात मोठ्या प्रमाणात मोहर आला. मात्र या कालावधीत धुक्यांचे प्रमाण वाढले.

काही दिवस ढगाळ वातावरण देखील राहिले. मात्र सर्वांत मोठा फटका वाढलेल्या तापमानाचा बसला. मोहरासोबत आंब्याच्या लहान लहान फळांची गळ झाली. काही प्रमाणात आंबा करपला देखील. या सर्वांचा परिणाम आंबा उत्पादनावर होणार आहे. गेल्या वर्षीच्या तुलनेत या वर्षी २० ते २५ टक्केच उत्पादन येण्याचा अंदाज आंबा उत्पादकांकडून सांगितला जात आहे.

गेल्या आठ ते दहा दिवसांपासून हापूसच्या आवकेत वाढ होत असली तरी अपेक्षित आवक अजूनही होताना दिसत नाही. त्यामुळे हापूसचे दर स्थिर आहेत. सध्या हापूसच्या चार डझनी पेटीला ६ ते ७ हजार रुपये दर मिळत आहे. तर देवगड स्थानिक बाजारपेठेत प्रति डझन १८०० ते २००० रुपयांनी आंबा विक्री केला जात आहे. आंबा उत्पादनाची स्थिती पाहता हेच दर पुढे कायम राहण्याची शक्यता आहे. दरम्यान, दुसऱ्या आणि तिसऱ्या टप्प्यांतील मोहराचे मोठ्या प्रमाणात नुकसान झाल्यामुळे मे महिन्यात आंबा अत्यल्प प्रमाणात मिळण्याचा अंदाज आहे.