Soybean Market Rate : चार महिन्यांपासून सोयाबीनचे दर स्थिरच

Washim News : मागील चार महिन्यांपासून सोयाबीनचा भाव पाच हजारांवरच स्थिरावले असून खरिपाच्या तोंडावर दरात सुधारणा होईल, अशी आशा ठेवलेल्या शेतकऱ्यांचा अपेक्षाभंग झाला. सोयाबीन साठवणूक केलेले शेतकरी चिंताग्रस्त झाले आहेत.

खरीप हंगामाच्या तोंडावर भाववाढ होऊन दोन पैसे अधिक मिळतील असा बहुतांश शेतकऱ्यांचा अंदाज असतो. जूनमध्ये सोयाबीनसह इतर खरीप मालाची भाववाढ होत असल्याचा अनुभव दरवर्षी शेतकऱ्यांना येतो. परंतु यावर्षी सात हजारांवर भाव मिळेल या आशेने सोयाबीन साठवणूक केलेले शेतकरी चिंताग्रस्त झाले आहेत.

अजूनही सोयाबीन विकावे की ठेवावे अशी संभ्रमावस्था शेतकऱ्यांची झालेली आहे. खरिपाच्या पेरणीसाठी तजवीजसाठी आता काही शेतकरी सोयाबीनची विक्री करीत असल्याचे निदर्शनास येत आहे. गेल्यावेळी ऐन काढणीच्या काळात झालेल्या अतिवृष्टीने सोयाबीन पिकाचे मोठे नुकसान झाले होते.

यातून शेतकऱ्यांनी मालाची प्रतवारी करून दरात सुधारणा होण्याच्या अपेक्षेने सोयाबीन राखून ठेवले होते. त्यामुळे मागील हंगामात सोयाबीनला दहा हजारांच्या आसपास भाव मिळाला होता.

यावर्षीही खरिपाच्या तोंडावर दरात सुधारणा होऊन किमान सात हजारांपेक्षा जास्त भाव मिळेल, या आशेवर शेतकरी होते. परंतु मागील चार ते पाच महिन्यांपासून सोयाबीनचे दर पाच हजारांवरच स्थिरावले आहेत. अद्याप अनेक शेतकरी दर सुधारण्याच्या अपेक्षेने सोयाबीन विक्रीसाठी थांबलेले आहेत.