DAP Fertilizer Prices : डीएपी खताचे भाव वाढणार नाहीत; शेतकऱ्यांना दिलासा

Pune News : नव्या वर्षात डीएपी खताचे भाव वाढणार, अशा बातम्यांमुळे शेतकरी धास्तावले होते. पण केंद्र सरकारने अनुदान वाढवल्याने डीएपीचे भाव स्थिर राहणार आहेत. डीएपी खताची ५० किलोची बॅग १ हजार ३५० रुपयांना मिळणार आहे. शेतकऱ्यांवरील भाववाढीचा बोजा कमी करण्यासाठी सरकारने अनुदान वाढविण्याचा निर्णय घेतल्याचे केंद्रीय माहिती आणि दूरसंचार मंत्री अश्विनी वैष्णव यांनी सांगितले.

देशात वर्षाला किमान १०५ ते ११० लाख टन डीएपीचा वापर होतो. मात्र आंतरराष्ट्रीय बाजारात कच्च्या मालाच्या किमती वाढल्याने डीएपी महाग होत आहे. कारण हा कच्चा माल कंपन्यांना आयात करावा लागत आहे. आंतरराष्ट्रीय खत बाजारात डीएपीच्या किमती गेल्या काही महिन्यांपासून भडकल्या आहेत. त्याचा परिणाम देशातील दरावरही होत आहे. पण देशात खतांच्या किमतीवर सरकारचे नियंत्रण आहे. खत कंपन्या मागील काही महिन्यांपासून डीएपीचे दर वाढविण्याची मागणी करत होत्या. केंद्रानेही नुकतेच दरवाढीला परवानगी दिली होती.

केंद्र सरकारने डीएपीचे दर वाढविण्याला परवानगी दिली. मात्र खतांवरील अनुदानाचा फेरविचार केला नव्हता. त्यामुळे देशात १ जानेवारीपासून डीएपीचे भाव वाढतील, अशी परिस्थिती होती. डीएपीच्या एका बॅगचा भाव १ हजार ३५० रुपये होता. पण भाव वाढून १ हजार ५५० रुपये होईल, अशी भीती असल्याने शेतकऱ्यांमध्ये चिंता होती. पण केंद्र सरकारने खतांवरील अनुदान वाढवल्याने डीएपीचे भाव स्थिर राहण्याला मदत होणार आहे. म्हणजेच डीएपीच्या भावात वाढ होणार नाही.

यापूर्वीही कॅबिनेटने जुलै २०२४ मध्ये प्रतिटन ३ हजार ५०० रुपयांचे एकरकमी विशेष पॅकेज एप्रिल २०२४ ते डिसेंबर २०२४ साठी दिले होते. त्यासाठी अंदाजे २ हजार ६२५ कोटी रुपयांचा खर्च झाल्याची शक्यता आहे.

अनुदान वाढवले

शेतकऱ्यांना डीएपीची ५० किलोची बॅग १३५० रुपयांनाच मिळावी यासाठी सरकारने प्रतिबॅग १७५ रुपये अनुदान देण्याचा निर्णय घेतला. कॅबिनेटने बुधवारी (ता. १) १ जानेवारीपासून डीएपीसाठी प्रतिटन ३ हजार ५०० रुपये विशेष अनुदान देण्याचा निर्णय घेतला. त्यासाठी ३ हजार ८५० कोटी रुपयांचे एकरकमी विशेष पॅकेज देण्यात येणार आहे. हे अनुदान पुढील आदेश येईपर्यंत सुरू राहणार आहे.

कारवाई करणार...