Banana Rate : केळीला विक्रमी ३१०० रुपये दर

Jalgaon News : खानदेशात केळीदर या हंगामात विक्रमी स्थितीत पोहोचले असून, थेट किंवा शिवार खरेदीत कमाल दर ३१०० रुपये प्रतिक्विंटल मिळत आहे. केळीची आवक स्थिर आहे. पण उठाव अधिक व पुरवठा कमी अशी स्थिती असल्याने दरात मागील महिन्यात सतत सुधारणा झाली आहे.

खानदेशात मार्च ते जूनच्या मध्यापर्यंत केळी दर ५०० ते ९०० रुपये प्रतिक्विंटल होते. निर्यातीच्या केळीस १००० रुपये प्रतिक्विंटलचा दर या कालावधीत होता. या कालावधीत खानदेशात ४५० ते ५०० ट्रक (एक ट्रक १६ टन क्षमता) केळीची आवक सुरू होती.

परंतु जूननंतर केळी आवक कमी झाली व दरात सुधारणा सुरू झाली. उत्तरेकडील श्रावण मासात केळीची मागणी वाढली. यानंतर राज्यासह अन्यत्रही श्रावण सुरू झाला आणि केळीदर हळूहळू २००० रुपये प्रतिक्विंटलपर्यंत पोहोचले.

ऑगस्टमध्ये केळी दरात सुधारणा सुरूच होती. या महिन्यात दर आठवड्याला क्विंटलमागे दरात २०० रुपयांची सरासरी वाढ झाली. दर्जेदार केळीचे दर ऑगस्टअखेरीस ३१०० रुपये प्रतिक्विंटलपर्यंत पोहोचले.

कमी दर्जाची केळीही खानदेशात फारशी उपलब्ध नाहीत. खानदेशात सध्या धुळ्यात केळीची अल्प आवक आहे. नंदुरबारमध्येही रोज आठ ते १० ट्रक (एक ट्रक १६ टन क्षमता) केळीची आवक आहे.