Onion Market Update Manchar : मंचर (ता. आंबेगाव) येथील बाजार समितीच्या आवारात (ता. ३०) कांद्याची सुमारे ९० हजार गोणी इतकी विक्रमी आवक (Onion Arrival) झाली. आत्तापर्यंतची ही आवक विक्रमी होती.
मात्र, त्यामुळे कांद्याच्या बाजार भावात (Onion Market Rate) घसरण झाल्याने शेतकऱ्यांनी नाराजी व्यक्त केली असून, कांदा प्रतवारीनुसार ५०० ते ७०० रुपये क्विंटल दराने व्यापाऱ्यांनी खरेदी केला.
राज्य सरकारने ३१ मार्चपर्यंतच्या विक्री केलेल्या कांद्याला क्विंटलला ३५० रुपये अनुदान देणार असल्याचे जाहीर केल्याने शेतकऱ्यांनी ३१ मार्चअखेर कांदा मोठ्या प्रमाणात विक्रीला आणला होता. गेल्या काही दिवसापासून कांद्याचे बाजारभाव चांगलेच पडले आहेत.
त्यातच ३१ मार्च ही तारीख शुक्रवारी आल्याने शेतकऱ्यांनी मंचर बाजार समितीच्या आवारात मोठ्या प्रमाणात कांदा विक्रीसाठी आणला होता. त्यामुळे गुरुवारी (ता. ३०) बाजार समितीच्या आवारात कांद्याची मोठी आवक झालेली पाहायला मिळाली.
सध्या कांद्याला समाधानकारक बाजारभाव नाही. कांदा पिकासाठी गुंतवलेले भांडवलही वसूल होत नाही. कांद्याला दहा किलोला दोनशे रुपयांच्या पुढे बाजारभाव मिळेल, तेव्हाच शेतकऱ्यांच्या पदरात काहीतरी पडणार आहे.
कांदा अनुदानाबाबतचा राज्य शासनाचा निर्णय स्वागतार्ह आहे. बाजारभाव समाधानकारक मिळणार नाही तोपर्यंत राज्य सरकारने कांदा उत्पादकांना अनुदान देणे गरजेचे आहे.
- तबाजी लोखंडे, कांदा उत्पादक शेतकरी, वळती
रविवारी (ता. २६) सुमारे ८० हजार कांदा पिशव्यांची आवक झाली होती. त्यावेळी क्विंटलला ६०० ते १२५० रुपये बाजार भाव मिळाला. त्या तुलनेत गुरुवारी (ता. ३०) प्रतवारीनुसार ५०० से ७०० रुपये क्विंटल दराने कांदा विकला गेला.
- वसंतराव थोरात, कांदा व्यापारी, मंचर
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
