Tur Market: बाजारात तुरीचे दर टिकून; दरात काहीसे चढ उतारही सुरु

Tur Market Rate : देशातील बाजारात सध्या तुरीच्या दरात काहीसे चढ उतार सुरु आहेत. पण तुरीचा भाव आजही ९ हजार ते १० हजार ३०० रुपयांच्या दरम्यान आहेत. सरकार तुरीचे भाव कमी करण्यासाठी मिलर्सना तुरीची विक्री करणार आहे. पण यामुळेही तुरीच्या दरातील तेजी कमी होण्याची शक्यता नसल्याचं जाणकारांनी सांगितले.

देशात यंदा तुरीच्या उत्पादनता मोठी घट झाली. त्यातच आयातीवर मर्यादा असल्याने देशांतर्गत बाजारात मोठी वाढ झाली. तुरीच्या भावात झालेली वाढ मात्र सरकारची डोकेदुखी ठरली. निवडणुका काही महिन्यांवर आल्यानंतर सरकार वाढलेले भाव कमी करण्यासाठी अॅक्शन मोडवर आले. सरकारने टप्प्याटप्प्याने निर्णय घेत भाव कमी करण्याचा प्रयत्न केला. स्टाॅक लिमिटही लावले. आता स्टाॅकमधील तूर विक्रीचा निर्णय सरकारने घेतला.

सरकार तुरीच्या बाजारावर दबाव वाढवत आहे. सरकारने तूर आयात वाढीसाठी प्रयत्न केले. स्टाॅकमधील तूरही विक्री करण्याचा निर्णय घेतला. यामुळे तूर दरवाढीला काहीसा ब्रेक बसला. मागील महिनाभरात तुरीचे भाव स्थिर होते. तुरीचा कमाल भाव १० हजार ५०० रुपये होता. दरात वाढ होत नसल्याने आणि सरकारचा बाजारावरील दबाव वाढत असल्याने स्टाॅकिस्ट नफावसुली करत आहेत. यामुळे तुरीच्या दरात काहीसे चढ उतार सुरु आहेत.

तुरीच्या दरात मागील तीन आठवड्यांपासून २०० ते ३०० रुपये प्रतिक्विंटलपर्यंत चढ उतार सुरु आहेत. बाजारभाव एका पातळीपेक्षा जास्त वाढत नसल्याने अनेक स्टाॅकिस्ट माल बाहेर काढत आहेत. यामुळे दरही स्थिर आहेत. सध्या बाजारात तुरीला प्रतिक्विंटल सरासरी ९ हजार ते १० हजार ३०० रुपये भाव मिळत आहे. तर डाळीचे भाव बहुतांशी बाजारांमध्ये १३० ते १४० रुपये प्रतिकिलोवर पोचले आहेत.

देशात लगेच तुरीचा पुरवठा वाढण्याची कमीच आहे. देशातील नवी तूर नोव्हेंबरपासून बाजारात येईल. तर आफ्रिकेतील तूर ऑगस्टपासून बाजारात येईल. पण देशात आयात होईपर्यंत सप्टेंबर उजाडू शकतो. आफ्रिकेत ६ लाख टनांच्या आसपास तूर उपलब्ध होऊ शकते, असे आयातदारांनी सांगितले. पण यंदा तुरीचा पुरवठा खूपच कमी आहे. त्यामुळे तुरीचे भाव देशाचा हंगाम सुरु होईपर्यंत कायम राहू शकतात, असा अंदाज जाणकारांनी व्यक्त केला.