Agrowon Podcast: हळदीत काहीसे चढ उतार; मका, टोमॅटो, कापूस तसेच काय आहेत सोयाबीन भाव?

Market Bulletin:

टोमॅटो दरात घसरण

बाजारातील वाढत्या आकेबरोबर टोमॅटोच्या दरावरही दबाव वाढत गेला. टोमॅटोच्या भावात मागील तीन आठवड्यांमध्ये मोठी घसरण झाली. तोटा वाढल्याने बाजारातील आवक वाढत असल्याचे व्यापारी सांगत आहेत. राज्यातील सर्वच बाजारांमध्ये टोमॅटोची आवक वाढलेली दिसत आहे. त्यामुळे टोमॅटोला सध्या बाजारात सरासरी ७०० ते ९०० रुपयांचा भाव मिळत आहे. टोमॅटो बाजारातील आवक आणखी काही आठवडे कायम राहू शकते. त्यामुळे दरावरही दबाव दिसू शकतो, असा अंदाज टोमॅटो बाजारातील अभ्यासकांनी व्यक्त केला.

मका दरावर दबाव

बाजारामध्ये सध्या रब्बीचा मका विक्रीसाठी येत आहे. यंदा खरिप आणि रब्बी दोन्ही हंगामात मका लागवड आणि उत्पादन वाढले होते. बाजारातील मक्याची आवकही चांगली आहे. त्यामुळे मक्याच्या दरावर काहीसा दबाव आला. सध्या मक्याला बाजारात सरासरी २ हजार ते २ हजार ३०० रुपयांच्या भाव मिळत आहे. महत्वाच्या रब्बी मका उत्पादक भागातील आवक चांगली आहे. मक्याची बाजारातील आवक आणखी काही आठवडे टिकून राहण्याचा अंदाज आहे. त्यामुळे काही आठवडे मक्याच्या भावात काहीसे चढ उतार दिसू शकतात, असा अंदाज मका बाजारातील अभ्यासकांनी व्यक्त केला.

हळदीत चढ उतार

हळदीच्या बाजारात काहीसे चढ उतार सुरु आहेत. बाजारात नव्या मालाची आवक सुरु असून दुसरीकडे मागणीही टिकून आहे. मागील हंगामातील शिल्लक स्टाॅकही मर्यादीत आहे. त्यामुळे यंदा उत्पादनात वाढीचा अंदाज असला तरी दर तेजीतच दिसत आहेत. हळदीला सध्या सरासरी ११ हजार ते १६ हजार रुपयांच्या दरम्यान भाव मिळत आहे. बाजारातील दर वाढल्यानंतर आवकही वाढल्याची दिसते तर दर कमी झाल्यानंतर आवक मंदावल्याचे दिसते. त्यामुळे दरपातळी एका मर्यादेत कमी जास्त होताना दिसत आहे. बाजारातील ही स्थिती आणखी काही आठवडे राहू शकते, असा अंदाज हळद बाजारातील अभ्यासकांनी व्यक्त केला.

सोयाबीन दबावातच

सोयाबीनच्या भावात काहीसे चढ उतार सुरु असले तरी सरासरी दरपातळी मात्र स्थिर दिसत आहे. सोयाबीनची बाजारातील आवक मागील दोन आठवड्यांपासून कमी झाली आहे. प्रक्रिया प्लांट्सची सोयाबीन खरेदीही स्थिर आहे. मागणीत फार मोठी वाढ झालेली दिसत नाही. त्यामुळे दरपातळी स्थिर दिसत आहे. सोयाबीनला आजही ४ हजार २०० ते ४ हजार ४०० रुपयांच्या दरम्यान सोयाबीनला भाव मिळत आहे. तर प्रक्रिया प्लांट्सचे भावही ४ हजार ५५० ते ४ हजार ६५० रुपयांच्या दरम्यान होते. सोयाबीनच्या भावातील चढ उतार कायम राहतील, असा अंदाज सोयाबीन बाजारातील अभ्यासकांनी व्यक्त केला.

कापूस आवक घटली

बाजारातील कापसाची आवक आटवड्यागणिक कमी होताना दिसत आहे. मात्र उद्योगांकडूनही गरजेप्रमाणे खरेदी होत आहे. त्यामुळे कापसाच्या भावात फार मोठी तेजी आतापर्यंत दिसली नाही. कापसाचे भाव देशातील बहुतांशी बाजारात सध्या ७ हजार ३०० ते ७ हजार ७०० रपुयांच्या दसम्यान दिसत आहेत. बाजारातील कापूस आवक सध्या ३५ हजार गाठींच्या दरम्यान आहे. पुढील दोन आठवड्यांत ही आवक पुन्हा कमी होण्याची शक्यता आहे. त्यामुळे दरालाही आधार मिळू शकतो. मात्र सीसीआयच्या कापूस विक्रीचे दर काय राहतात? याकडेही बाजाराचे लक्ष असेल, असे कापूस बाजारातील अभ्यासकांनी सांगितले.