Agrowon Podcast : सोयाबीन वायदे निचांकी पातळीवर; कापूस, सोयाबीन, कांदा, तसेच तूर दर काय आहेत?

Market Bulletin : आंतरराष्ट्रीय बाजारात सोयाबीन आणि सोयापेंडच्या वायद्यांमध्ये मोठी नरमाई आली. सोयाबीनचे वायदे गेल्या चार वर्षातील निचांकी पातळीवर पोचले आहेत. आज दुपारपर्यंत सोयाबीनचे वायदे १०.८९ डाॅलर प्रतिबुशेल्सवर होते. तर सोयापेंडचे वायदे ३१२ डाॅलर प्रतिटनांवर होते. देशातील बाजारातही सोयाबीनच्या भावावरील दबाव कायम आहे. सोयाबीन मागील तीन महिन्यांपासून ४ हजार १०० ते ४ हजार ५०० रुपयांच्या दरम्यान विकले जात आहे. ही स्थिती आणखी काही दिवस राहू शकते, असा अंदाज सोयाबीन सोयाबीन बाजारातील अभ्यासकांनी व्यक्त केला. 

कापसाच्या वायद्यांमध्ये आज काहीशी नरमाई दिसून आली. कापसाचे वायदे आंतरराष्ट्रीय बाजारात दुपारपर्यंत ७१.४६ सेंट प्रतिपाऊंडच्या दरम्यान होते. तर देशातील कापूस खंडीचे व्यवहार ५७ हजार ५९ हजार रुपयाने झाले. बाजार समित्यांमधील आवक आता खूपच कमी झाली. पण तरीही कापसाच्या भावावरील दबाव कायम आहे. बाजार समित्यांमध्ये कापसाचे भाव सरासरी ७ हजार ३०० ते ७ हजार ९०० रुपयांच्या दरम्यान होते. कापूस बाजारातील ही स्थिती आणखी काही दिवस कायम राहू शकते, असा अंदाज कापूस बाजारातील अभ्यासकांनी व्यक्त केला.

तुरीच्या भावात मागील आठवडाभारात काहीशी सुधारणा दिसून आली. सरकारने स्टाॅक लिमिटचा कालावधी वाढवल्यामुळे दरात काही नरमाई आली होती. पण बाजारात पुन्हा आधीच्या पातळीवर पोचला आहे. तुरीचे भाव सध्या ११ हजार ते ११ हजार ५०० रुपयांच्या दरम्यान दिसत आहेत. बाजारातील तुरीची घटलेली आवक आणि चांगली मागणी यामुळे तुरीच्या भावाला चांगला आधार आहे. तुरीच्या बाजारातील तेजी कायम राहील, असा अंदाज तूर बाजारातील अभ्यासकांनी व्यक्त केला.

कांद्याच्या सरासरी भावात पुन्हा काहीशी सुधारणा दिसून येत आहे. कांद्याचा कमी झालेला सरासरी भाव पुन्हा पुर्वीच्या पातळीकडे वाटचाल करताना दिसत आहे. बाजारातील कांद्याची आवक वाढलेल्या पावसामुळे कमी झाली. पण कांद्याचा उठाव कायम आहे. त्यामुळे कांद्याला आज सरासरी २ हजार ५०० ते ३ हजार रुपयांच्या दरम्यान पोचला. बाजारातील कांद्याची आवक यापुढच्या काळातही कमीच राहण्याची शक्यता आहे. पण मागणीत होणाऱ्या बदलानुसार बाजारातील दरही बदलू शकतात, असा अंदाज कांदा बाजारातील व्यापारी व्यक्त करत आहेत.

देशात मक्याला सध्या चांगली मागणी आहे. मक्याचा वापर इथेनाॅल निर्मितीसाठी वाढत आहे. उसाचे उत्पादन कमी झाल्याने इथेनाॅल उद्योगाने आपला मोर्चा मक्याकडे वळवला. परिणामी पोल्ट्री आणि प्रक्रिया उद्योगासोबतच इथेनाॅलमध्येही मागणी वाढली. याचा आधार भावाला होत असून सध्या मका २ हजार २०० ते २ हजार ६०० रुपयांच्या दरम्यान विकला जात आहे. तर एनसीडीईएक्सच्या डिलेव्हरी केद्रांवर मका २८०० रुपयांनी विकला जात आहे. मक्याच्या भावात आणखी २०० ते ३०० रुपयांपर्यंतची सुधारणा पुढच्या काळात होऊ शकते, असा अंदाज अभ्यासकांनी व्यक्त केला.