Agrowon Podcast: जांभळाचे भाव तेजीत; कोबी, गहू, गाजर तसेच काय आहेत ज्वारीचे दर?

Market Bulletin:

कोबीचे दर टिकून

कोबीचे बाजारभाव मागील काही दिवसांपासून टिकून आहेत. बाजारातील कोबीची आवक सरासरीच आहे. तर कोबीला उठावही चांगला आहे. त्यामुळे कोबीचे दर टिकून आहेत. कोबीला बाजारात सध्या सरासरी ८०० ते १ हजार रुपयांच्या दरम्यान दर मिळत आहेत. राज्यात मे महिन्यात झालेल्या पावसाचा कोबी पिकालाही फटका बसला. त्यामुळे पुढील काही आठवडे कोबीची बाजारातील आवक स्थिर राहण्याची शक्यता आहे. त्यामुळे कोबीचे दरही टिकून राहतील, असा अंदाज कोबी बाजारातील व्यापाऱ्यांनी व्यक्त केला. 

गव्हाचे दर स्थिर

देशातील गव्हाचे उत्पादन वाढल्यानंतरही दर तेजीत होते. मागील हंगामात शिल्लक स्टाॅक असल्याने दर वाढले होते. सरकारने गव्हावर स्टाॅक लिमिट लागू केले. त्यामुळे गहू बाजारातील तेजी कमी झाली. मात्र गव्हाचे दर टिकून आहेत. गव्हाचे भाव आजही सरासरी २ हजार ५०० ते २ हजार ७०० रुपयांच्या दरम्यान आहेत. सरकारची खरेदीही ३०० लाख टनांच्या दरम्यान झाली. यापुढील काळात बाजारातील गव्हाची आवक कमीच राहण्याचा अंदाज आहे. मात्र स्टाॅक लिमिटचा दबाव बाजारावर असेल. तरीही दरात पुढील काही आठवड्यांमध्ये काहीशी सुधारणा अपेक्षित आहे, असे गहू बाजारातील अभ्यासकांनी सांगितले. 

गाजराला उठाव

गाजराची बाजारातील आवक मागील काही आठवड्यांपासून कमी झाली आहे. मे महिन्यातील पावसाने राज्यातील अनेक भागात पिकाचे नुकसान झाले. यामुळे आवक कमी असल्याचे शेतकरी सांगत आहेत. तर लग्नसराईमुळे गाजराला चांगला उठाव आहे. याचा आधार दराला मिळत आहे. सध्या बाजारात गाजर प्रतिक्विंटल सरासरी २ हजार ते २ हजार ५०० रुपयांच्या दरम्यान विकले जात आहे. पिकाचे नुकसान झाल्याने पुढील काही आठवडे बाजारातील आवकही कमीच राहण्याची शक्यता आहे. त्यामुळे गाजराचे दरही टिकून राहतील, असा अंदाज व्यापारी व्यक्त करत आहेत. 

जांभूळ तेजीत

जांभळाचा हंगाम आता सुरु झाला. सध्या बाजारातील आवक कमी आहे. तसेच पाऊस आणि बदलत्या वातावरणाचा जांभूळ पिकावर परिणाम दिसत आहे. बाजारात सध्या गुणवत्तापूर्ण जांभळाला मागणी चांगली आहे. त्यामुळे दरही तेजीत आहेत. जांभळाला सध्या गुणवत्तेप्रमाणे ६ हजार ते १२ हजार रुपये प्रतिक्विंटलच्या दरम्यान भाव मिळत आहे. पुढील काळात जांभळाची आवक वाढण्याचा अंदाज आहे. पण आवक सरासरीपेक्षा कमीच राहील, असे शेतकरी सांगत आहेत. त्यामुळे जांभळाचे भावही तेजीतच राहतील, असा अंदाज व्यापारी व्यक्त करत आहेत. 

ज्वारीचे दर दबावातच

ज्वारीचे उत्पादन चांगले झाल्याने दरावर दबाव असल्याचे दिसत आहे. रब्बीच्या ज्वारीची बाजारात आवक सुरु झाल्यानंतर दरावर दबाव वाढला होता. दरपातळी २०० ते ३०० रुपयांनी कमी झाली होती. ज्वारीच्या दरावरील दबाव आजही कायम आहे. ज्वारीला सरासरी प्रतिक्विंटल २६०० ते २८०० रुपयांच्या दरम्यान आहेत. ज्वारीची बाजारातील आवक सध्या कमी झाली आहे. पुढील काही आठवड्यांमध्ये ज्वारीची आवक कमी होण्याची शक्यात आहे. त्यामुळे दरातही सुधारणा होऊ शकते, असा अंदाज ज्वारी बाजारातील व्यापारी व्यक्त करत आहेत.