Canning Mango Price: कॅनिंगसाठी आंब्याला २८ ते ३० रुपये दर

Sindhudurg News: सिंधुदुर्ग जिल्ह्यात कॅनिंगच्या आंबा दरात मोठी घसरण झाली आहे. कॅनिंग आंबा हंगाम अंतिम टप्प्यात असून सध्या प्रतिकिलो २८ ते ३० रुपये दराने आंबा खरेदी केला जात आहे. नाशिक, पुणे आणि स्थानिक प्रक्रिया उद्योजकांनी २५ हजार टन आंबा खरेदी केल्याचा अंदाज आहे.

हंगामातील अखेरचा आंबा कॅनिंगकरिता दिला जातो. या वर्षी कॅनिंग हंगाम एप्रिल अखेरीपासून सुरू झाला. सुरुवातीला कॅनिंगच्या आंब्याला चांगला दर मिळाला. प्रतिकिलो ५५ रुपये दर होता. त्यानंतर आठ ते दहा दिवसांनी त्यामध्ये घसरण होत, तो प्रतिकिलो ४२ रुपयांवर टिकून होता. मात्र दोन दिवसांपासून त्यामध्ये मोठी घसरण झाली आहे. अंतिम टप्प्यातील आंबा सध्या प्रतिकिलो २८ रुपये दरांनी खरेदी केला जात आहे. येत्या चार दिवसांत हा हंगाम संपण्याचा देखील अंदाज आहे.

या वर्षी आंबा उत्पादन २५ ते ३० टक्केच होते. परंतु त्याचा मोठा परिणाम कॅनिंगच्या आंब्यावर झाला नाही. कॅनिंगला मोठ्या प्रमाणात आंबा हा देवगड तालुक्यातून खरेदी केला जातो. नाशिक, पुणे, रत्नागिरी आणि स्थानिक प्रक्रिया उद्योजक आंबा पल्पकरिता हा आंबा खरेदी करतात. या वर्षी साधारणपणे केवळ देवगड तालुक्यातून २५ हजार टन आंबा कॅनिंगला गेल्याचा अंदाज आहे.