Cotton Kheda Kharedi : खानदेशात कापूस खेडा खरेदीस कमी प्रतिसाद

Cotton Market जळगाव ः खानदेशात कापसाच्या खेडा खरेदीला (जागेवर किंवा थेट खरेदी) कमी प्रतिसाद मिळत आहे. दर ७८०० ते ८१०० रुपये प्रतिक्विंटल असे आहेत. शेतकऱ्यांना दरवाढीची प्रतीक्षा आहे.

गुजरातमधील कारखानदारांकडून धुळे व नंदुरबार भागात खरेदी सुरू आहे. काही शेतकरी कापसाची विक्री करीत आहेत. परंतु साठविलेल्या कापसाची एकाच वेळी पूर्ण विक्री टाळत आहेत.

खानदेशात दरवर्षी २५ ते २७ लाख कापूस गाठींचे उत्पादन जिनिंग-प्रेसिंग कारखान्यांत केले जाते. परंतु कारखाने कोविडनंतर फारसे सुरू नाहीत. त्यातच तेजीत कारखाने बंद असतात व मंदीमध्ये सुरू असतात, असेही चित्र आहे.

खानदेशात गुजरातमधील कारखानदार, मोठे खरेदीदार एजंटच्या मदतीने कापूस खरेदी करतात. परंतु यंदा बाजार अस्थिर असल्याने गुजरातमधील खरेदी फक्त धुळ्यापर्यंतच केली जात आहे.

जळगाव जिल्ह्यात काही स्थानिक कारखानदार, व्यापारी एजंटच्या मदतीने कापूस खरेदी करीत आहेत. खानदेशातील बाजारांत कापसाची ४० टक्के आवक झाली आहे.

धुळे व नंदुरबार जिल्ह्यात अनेक शेतकऱ्यांनी कापसाची विक्री केली आहे. जळगाव जिल्ह्यातही नोव्हेंबर व डिसेंबरमध्ये अनेक शेतकऱ्यांनी आपल्या निम्म्या कापसाची विक्री केली आहे.

परंतु डिसेंबरच्या मध्यानंतर कापूस विक्री फारशी शेतकऱ्यांनी केलेली नाही. कारण दर ७८०० ते ८०००, तर सर्वसाधारण ८२५० रुपये प्रतिक्विंटल राहिले आहेत. शेतकऱ्यांना उत्पादन खर्चानुसार किमान १० हजार रुपये प्रतिक्विंटलचा दर अपेक्षित आहे.

कापूस प्रक्रिया मंद गतीने

अनेक खरेदीदारही मंदीचे कारण सांगून आपले कारखाने निम्म्याच क्षमतेने सुरू ठेवत आहेत. यामुळे कापूस प्रक्रियाही मंद गतीने सुरू आहे. परिणामी खेडा खरेदीदेखील रखडत सुरू आहे.