Sugar Production : साखर उत्पादनासह उताऱ्यात कोल्हापूर विभागाची आघाडी

Kolhapur News : राज्याच्या गळीत हंगामात कोल्हापूर विभागाने साखर उत्पादन व उतारा या दोन्‍ही विभागांत अग्रक्रम मिळविला आहे. शुक्रवारअखेर (ता. १२) १०.५४ टक्के उतारा मिळवत या विभागाने ११ लाख टन साखर तयार केली आहे.

कोल्हापूरसह, पुणे, सोलापूर विभागांत थोडासा फरक वगळता ऊसगाळप समान होत आहे. तिन्‍ही विभागांत प्रत्येकी १११ ते ११२ लाख टनांच्या दरम्यान उसाचे गाळप होत आहे.

राज्यात एकूण ऊस गाळप ५१५ लाख टन झाले. साखर उत्पादन ४७ लाख टन झाले. गेल्‍या वर्षीच्या तुलनेत अद्यापही १० लाख टन साखर उत्पादन कमी आहे. राज्याचा सरासरी उतारा ९.२ टक्के आहे. सर्वांत कमी उतारा नागपूर विभागाचा केवळ ३.६७ टक्के आहे.

यंदा ऊस हंगाम सुरू झाल्यानंतर सोलापूर व पुणे विभाग साखर उत्पादनात आघाडीवर होते. शेतकरी संघटनांच्या आंदोलनामुळे या विभागात ऊस तोडणी मंदगतीने सुरू होती. हंगाम सुरू झाल्यानंतर तब्बल एक महिन्याने कोल्हापूर विभाग साखर उत्पादनात आघाडीवर आला. गेल्या पंधरवड्याच्या तुलनेत राज्याच्या साखर उताऱ्यातही वाढ झाली आहे.

कोल्हापूर खालोखाल पुणे विभागाचा साखर उतारा ९.४५ तर अहमदनगर विभागाचा साखर उतारा ८.९८ टक्के आहे. सोलापूर विभागाचा उतारा ८.४८ टक्के आहे. यंदा गेल्‍या वर्षीच्या तुलनेत उसाचे उत्पादन कमी होण्याचा अंदाज होता.

पण सध्या हंगाम सुरू होण्‍याअगोदर उत्पादन घट अपेक्षित धरली होती तितकी उसाच्या उत्पादनात घट होत नसल्‍याचे कारखाना प्रतिनिधींनी सांगितले. नोव्‍हेंबरमध्ये झालेल्या पावसाने यंदाच्या अंदाजापेक्षा काहीसे उत्पादन अधिक येत आहे. गेल्या वर्षीच्या तुलनेत मात्र घट निश्चित झाली असल्‍याचे कारखान्यांच्या सूत्रांनी सांगितले.

तोडणी क्रमाकडे कारखान्‍यांचे दुर्लक्ष

काही कारखाने वगळता बहुतांश कारखान्यांचे लागवडीच्या तारखेनुसार असलेल्या उसाच्या तोड क्रमापाळीकडे दुर्लक्ष होत असल्‍याने ऊस उत्पादकांचा ऊस वेळेत तोडणी होत नसल्याच्या तक्रारी आहेत. ज्यांचा ऊस पडलेला आहे. त्याची तोड करण्‍यास नकार देण्‍याचे प्रकार वाढत आहेत.

प्रसंगी आर्थिक तडजोडी करून ऊस कारखान्‍याला पाठविण्याचा मनस्ताप उत्पादकांना सहन करावा लागत असल्याचे चित्र ऊस पट्ट्यात आहे. यामुळेच अनेक शेतकऱ्यांच्या ऊस तोडणीच्या तारखा पुढे जात आहेत.

गेल्या वर्षीच्या तुलनेत ऊस उत्पादन कमी होण्याचा अंदाज असला तरी त्या प्रमाणात तोडणी मात्र वेगात होत नसल्याचे चित्र आहे. कारखाना व्यवस्थापनांनी याकडे गांभिर्याने लक्ष देऊन उस तोडणी वेळेत करण्यासाठी प्रयत्न करावेत, अशी मागणी ऊस उत्‍पादकांमधून होत आहे.